ఏపీలో మళ్లీ భారీ వర్షాలు: ఉత్తర కోస్తా జిల్లాలకు వాతావరణ శాఖ హెచ్చరిక

ఆంధ్రప్రదేశ్‌లో మరోసారి భారీ వర్షాలు కురిసే అవకాశం ఉందని వాతావరణ శాఖ హెచ్చరించింది. ఉత్తర ఒడిశా, పశ్చిమ బెంగాల్ తీరంలో ఏర్పడిన ఉపరితల ఆవర్తనం కారణంగా రాష్ట్రంలో రాబోయే మూడు రోజుల పాటు విస్తారంగా వర్షాలు కురుస్తాయని అధికారులు తెలిపారు.

ముఖ్యంగా ఉత్తర కోస్తాంధ్రలోని శ్రీకాకుళం, విజయనగరం, విశాఖపట్నం జిల్లాలతో పాటు యానాంలో భారీ వర్షాలు పడే అవకాశం ఉందని రాష్ట్ర విపత్తు నిర్వహణ సంస్థ హెచ్చరించింది. ఈ ప్రాంతాల్లో గంటకు 40 నుంచి 50 కిలోమీటర్ల వేగంతో బలమైన గాలులు వీచే అవకాశం ఉందని వాతావరణ శాఖ పేర్కొంది.

మత్స్యకారులను అప్రమత్తంగా ఉండాలని, ప్రజలు అత్యవసరమైతే తప్ప బయటకు వెళ్లవద్దని సూచించారు. రైతులు వ్యవసాయ పనుల్లో తగు జాగ్రత్తలు తీసుకోవాలన్నారు. రాష్ట్రంలోని పలు ప్రాంతాల్లో తేలికపాటి నుంచి మోస్తరు వర్షాలు, కొన్ని చోట్ల ఉరుములు, మెరుపులతో కూడిన జల్లులు పడే అవకాశం ఉంది.

ప్రస్తుతం ఈ ఉపరితల ఆవర్తనం పశ్చిమ బెంగాల్, ఉత్తర ఒడిశా తీరం మరియు గంగా పరివాహక ప్రాంతంపై సముద్ర మట్టానికి 900 మీటర్ల ఎత్తులో కొనసాగుతోంది. దీని ప్రభావంతో నేడు, రేపు ఉత్తర, దక్షిణ కోస్తా జిల్లాల్లో తేలికపాటి నుంచి మోస్తరు వర్షాలు కురిసే అవకాశం ఉందని వాతావరణ శాఖ వివరించింది.