తెలంగాణలో భారీ వర్షాలు; ఉత్తర జిల్లాలకు ఆరెంజ్ అలర్ట్

తెలంగాణ రాష్ట్రంలో గత రెండు రోజులుగా భారీ వర్షాలు కురుస్తున్నాయి. బంగాళాఖాతంలో తీవ్ర వాయుగుండం ప్రభావంతో ఈ వర్షాలు పడుతున్నాయి. ముఖ్యంగా ఉత్తర తెలంగాణ జిల్లాల్లో వర్షాలు దంచికొడుతున్నాయి. మంగళవారం అర్ధరాత్రి నుంచి పలు ప్రాంతాల్లో అతిభారీ వర్షం నమోదైంది.

వాతావరణ శాఖ సమాచారం ప్రకారం, జయశంకర్ భూపాల్పల్లి జిల్లా సర్వాయిపేటలో అత్యధికంగా 19.6 సెంటీమీటర్ల వర్షపాతం నమోదైంది. జగిత్యాల జిల్లా సారంగాపూర్‌లో కూడా 19.6 సెం.మీ. వర్షం పడింది. సిరికొండలో 18.2, గుల్లకోటలో 17.6, వెల్లటూరులో 16.6, అల్లీపూర్‌లో 16, నేరేలలో 14.8 సెం.మీ. వర్షపాతం రికార్డైంది. బుధవారం కూడా ములుగు జిల్లా ఏటూరు నాగరంలో 15.2 సెం.మీ., వాజేడులో 14 సెం.మీ. వర్షం పడింది. ఇతర జిల్లాల్లో భారీ నుంచి అతిభారీ వర్షం కొనసాగింది.

భారీ వర్షాలతో ప్రాజెక్టుల్లోకి వరద నీరు భారీగా వచ్చిచేరింది. ఎల్లంపల్లి ప్రాజెక్టుకు 74,643 క్యూసెక్కులు, కడెం ప్రాజెక్టుకు 21,000 క్యూసెక్కులు, శ్రీరామ్ సాగర్ ప్రాజెక్టుకు 3,500 క్యూసెక్కుల నీరు వచ్చిచేరుతోంది. కృష్ణా బేసిన్‌లోనూ వరద ప్రవాహాలు క్రమంగా పెరుగుతున్నాయి.

వాతావరణ శాఖ గురువారం కూడా భారీ వర్షాలు పడే అవకాశం ఉందని హెచ్చరించింది. ఉత్తర తెలంగాణ జిల్లాలకు ఆరెంజ్ అలర్ట్ జారీ చేసింది. రాష్ట్రంలో లోటు వర్షపాతం సాధారణ స్థాయికి చేరుకుంటుందని వాతావరణ శాఖ తెలియజేసింది.