ఏపీ, తెలంగాణ: భారీ వర్షాలతో వాగులు పొంగి రాకపోకలకు అంతరాయం

రెండు నెలల విరామం తర్వాత ఏపీ, తెలంగాణలో భారీ వర్షాలు మొదలయ్యాయి. వాతావరణ శాఖ పలు జిల్లాలకు ఆరెంజ్, ఎల్లో అలర్ట్లు జారీ చేసింది.

తెలంగాణలోని నిర్మల్, మంచిర్యాల, కుమరంభీం జిల్లాల్లో ఎడతెరిపి లేని వర్షం కురిసింది. కానాపూర్ పరిధిలోని పల్లేరు వాగు, మంచిర్యాల జిల్లాలో రాళ్లవాగు ఉప్పొంగాయి. రాళ్లపేట కాజ్వే కొట్టుకుపోవడంతో రాకపోకలు నిలిచిపోయాయి. చింతగూడ దగ్గర భారీ చెట్టు కూలడంతో మరో మార్గం మూసుకుంది. బెల్లంపల్లి మండలం కన్నాలలో ఎర్రకుంట చెరువుకు గండి పడింది.

ములుగు, జయశంకర్ భూపాలపల్లి జిల్లాల్లోనూ భారీ వర్షాలు పడుతున్నాయి. వాజేడు మండలం చీకుపల్లి-పెద్దగొల్లగూడెం మధ్య జాతీయ రహదారి పనులు జరుగుతుండగా, ఇసుకవాగు ఉప్పొంగడంతో తాత్కాలిక డైవర్షన్ రోడ్డు కొట్టుకుపోయింది. జిల్లా కలెక్టర్, ఎస్పీ అక్కడ స్థితిని పరిశీలించి అధికారులను అప్రమత్తం చేశారు.

కుంటాల, పొచ్చర జలపాతాలు ముందుగా ఎండిపోయి ఇప్పుడు వర్షాలతో నీటి ప్రవాహం ఉధృతంగా ఉంది. బొగత జలపాతం కూడా ఉగ్రరూపం దాల్చింది. కాళేశ్వరం పుష్కర ఘాట్ మెట్లపై నుంచి వర్షపు నీరు ప్రవహిస్తూ జలపాతాన్ని తలపిస్తోంది.

జగిత్యాల జిల్లా మెట్పల్లిలో వరద నీరు ప్రాథమిక పాఠశాలలోకి చేరింది. వెంకటాద్రి నగర్-గోవిందపల్లె బ్రిడ్జ్ పై భారీగా వరద ప్రవహించడంతో జేసీబీ సాయంతో విద్యార్థులను, ప్రజలను తరలించారు. మెదక్ జిల్లా దూప్ సింగ్ తండా వద్ద గంగమ్మ వాగు ఉప్పొంగి రాకపోకలు నిలిచాయి. నిజామాబాద్ జిల్లాలో తీగల వాగు ఉగ్రరూపం దాల్చి పంట పొలాల్లోకి నీరు చేరడంతో రైతులు ఆందోళన వ్యక్తం చేస్తున్నారు.

ఏపీలో పోలవరం జిల్లా చింతూరు ఏజెన్సీలో భారీ వర్షాలు పడుతున్నాయి. వాగులు వంకలు పొంగి ప్రవహిస్తున్నాయి. పొల్లూరు జలపాతం ప్రమాదకరంగా మారడంతో పర్యాటకుల రాకపోకలపై అధికారులు ఆంక్షలు విధించారు.

హైదరాబాద్‌లో రెండు రోజులుగా వర్షం కురుస్తుండగా, నగరానికి ఎల్లో అలర్ట్ ప్రకటించారు. వాతావరణ శాఖ ఇతర జిల్లాలకు కూడా అలర్ట్లు జారీ చేసింది.