దేశవ్యాప్తంగా భారీ వర్షాలు; కేరళ, కర్ణాటక, గుజరాత్‌లో వరదలు, 13 మంది మృతి

భారతదేశంలో నైరుతి ఋతుపవనాలు చురుగ్గా కదులుతుండడంతో, IMD 20కి పైగా రాష్ట్రాలకు భారీ నుంచి అతి భారీ వర్షాల హెచ్చరికలు జారీ చేసింది. కేరళ, గుజరాత్, కర్ణాటక, ఛత్తీస్గఢ్, అస్సాం, జమ్మూ కాశ్మీర్‌లో వరదలు బీభత్సం సృష్టించాయి. వరదలు, కొండచరియల వల్ల ఇప్పటివరకు 13 మంది మరణించారు.

కేరళలో కుండపోత వర్షాలతో 8 మంది చనిపోయారు. రాష్ట్రంలో 27 ఇళ్లు పూర్తిగా, 196 ఇళ్లు పాక్షికంగా దెబ్బతిన్నాయి. NDRF 31 మందిని రక్షించింది. ఇడుక్కి జిల్లాలోని కల్లార్కుట్టి డ్యామ్ గేట్లు ఎత్తి నీటిని విడుదల చేశారు.

కర్ణాటకలోని శివమొగ్గ జిల్లా తీర్థహళ్లిలో కొండచరియలు విరిగిపడి, ఓ షెడ్డులో నిద్రిస్తున్న దంపతులు, మూడేళ్ల చిన్నారి మృతి చెందారు. వీరు వలస కూలీలు. అధికారులు JCB సాయంతో మృతదేహాలను వెలికితీశారు.

గుజరాత్‌లో వల్సాద్, సూరత్ ప్రాంతాల్లో భారీ వర్షాలు కురుస్తున్నాయి. హల్వద్ గ్రామాల్లో నీరు నిలిచిపోయింది. NDRF, SDRF బృందాలు 24 మందిని రక్షించాయి.

ఛత్తీస్గఢ్‌లోని నారాయణపూర్ జిల్లా అబుజ్మడ్ ప్రాంతంలో వరదలకు ఇద్దరు బాలికలు మరణించారు. 50కి పైగా ఇళ్లు దెబ్బతిన్నాయి. అస్సాంలోని పలు ప్రాంతాలు జలమయమయ్యాయి. జమ్మూ కాశ్మీర్‌లో క్లౌడ్ బరస్ట్ కారణంగా ఆకస్మిక వరదలు బందీపురా ప్రాంతంలో రాకపోకలు నిలిచిపోయేలా చేశాయి.

ప్రభావిత రాష్ట్రాల్లో NDRF, SDRF బృందాలు సహాయక చర్యలు కొనసాగిస్తున్నాయి.