విజయవాడలో భారీ వర్షం.. రహదారులు జలమయం, అప్రమత్తమైన అధికారులు

విజయవాడలో కురిసిన భారీ వర్షంతో రహదారులు జలమయం అయ్యాయి. బెంజ్ సర్కిల్, నిర్మల కాన్వెంట్ కూడలి తదితర ప్రాంతాల్లో నీరు నిలిచింది. లోతట్టు కాలనీల రహదారులపై నీరు ప్రవహించడంతో ప్రయాణికులు తీవ్ర ఇబ్బందులు ఎదుర్కొన్నారు. ఆటో వాలాలు వాహనాలను తోసుకుంటూ వెళ్లాల్సి వచ్చింది.

అకాల వర్షాలు కురిసే అవకాశం ఉన్నందున అన్ని శాఖల అధికారులు అప్రమత్తంగా ఉండాలని ఎన్టీఆర్ జిల్లా కలెక్టర్ జి. లక్ష్మి షా ఆదేశించారు. విజయవాడ నగరపాలక సంస్థ పరిధిలోని డ్రైనేజీ వ్యవస్థలో ఎక్కడా నీరు నిల్వ ఉండకుండా చర్యలు తీసుకోవాలని సూచించారు. రెవెన్యూ, పోలీస్, విద్యుత్, ఆర్అండ్బీ శాఖల సిబ్బంది అత్యవసర పరిస్థితుల్లో వెంటనే స్పందించేందుకు సిద్ధంగా ఉండాలని ఆదేశించారు.

స్థానిక వ్యాపారి ఒకరు మాట్లాడుతూ, బెంజ్ సర్కిల్, నిర్మల కాన్వెంట్ రోడ్లలో వర్షం పడగానే నీరు నిలిచిపోతుందని, నేషనల్ హైవే కింద డ్రైన్లు క్లియర్ చేస్తే నీటి ప్రవాహం మెరుగుపడుతుందని అభిప్రాయపడ్డారు. గతేడాది వరదల్లో తన షాపులోకి నీరు చేరి సుమారు 10 లక్షల రూపాయల నష్టం జరిగిందని తెలిపారు. ప్రస్తుత వర్షంలో కూడా షాప్ మెట్ల వరకు నీరు చేరిందని, డ్రైనేజీ సమస్య పరిష్కారం కావాలని కోరారు.

అత్యవసర సమయాల్లో సహాయం కోసం కలెక్టరేట్ కమాండ్ కంట్రోల్ కేంద్రానికి ఫోన్ చేయాలని కలెక్టర్ సూచించారు.