కామారెడ్డి జిల్లాలో భారీ వర్షాలు: రోడ్లపై వరద నీరు, రాకపోకలు నిలిచిపోయాయి

కామారెడ్డి జిల్లాలో నిన్న రాత్రి నుండి కురిసిన భారీ వర్షాలు పలు ప్రాంతాలను తీవ్రంగా నష్టపరిచాయి. జిల్లాలో అత్యధికంగా కామారెడ్డి పట్టణంలో 18 సెంటీమీటర్ల వర్షపాతం నమోదైంది. ఇతర ప్రాంతాల్లో బిట్లాంలో 12.7 సెం.మీ., మార్కంపూర్లో 12.5 సెం.మీ., గాంధారిలో 11.7 సెం.మీ. వర్షం కురిసింది. దీంతో జిల్లా యంత్రాంగం యెల్లో అలర్ట్ జారీ చేసింది.

భారీ వర్షాల కారణంగా పెద్ద చెరువు ఉదృతంగా ప్రవహిస్తూ ఉండగా, మాచారెడ్డి, తాడ్వాయ్, తోమకొండ, బిక్కనూర్, రాజంపేట మండలాల్లో వాగులు ప్రమాదకర స్థాయిలో ప్రవహిస్తున్నాయి. ఆయా గ్రామాలకు రాకపోకలు పూర్తిగా నిలిచిపోయాయి.

కామారెడ్డి పట్టణంలో సుభాష్ టాకీస్ ఏరియా, సైలాని బాబా కాలనీ, టీచర్స్ కాలనీ, విద్యానగర్ వంటి ప్రాంతాల్లో వరద నీరు ఇళ్లలోకి చేరింది. వాహనాలు నిలిచిపోవడంతో ప్రజలు తీవ్ర ఇబ్బందులకు గురవుతున్నారు. అత్యవసరమైతే తప్ప బయటకు రావద్దని అధికారులు ప్రజలకు సూచించారు. జిల్లా అధికారులు నిరంతరం పరిస్థితిని సమీక్షిస్తున్నారు.