తెలంగాణ, ఏపీలో భారీ వర్షాలు: వాగులు పొంగి, పలు జిల్లాల్లో రాకపోకలకు అంతరాయం

తెలంగాణ, ఆంధ్రప్రదేశ్‌లోని పలు జిల్లాల్లో భారీ వర్షాలు కురుస్తున్నాయి. రాష్ట్ర వాతావరణ శాఖ పలు జిల్లాలకు ఆరెంజ్, ఎల్లో అలర్ట్‌లు జారీ చేసింది.

తెలంగాణలోని నిర్మల్, మంచిర్యాల, కొమరంబీం, ఆదిలాబాద్, జయశంకర్ భూపాలపల్లి, ములుగు, జగిత్యాల, మెదక్, నిజామాబాద్ తదితర జిల్లాల్లో వర్షం ఎడతెరిపి లేకుండా కురుస్తోంది. దీనివల్ల వాగులు, వంకలు ఉప్పొంగి ప్రవహిస్తున్నాయి. మంచిర్యాల జిల్లా బెల్లంపల్లి మండలం కన్నాలలో ఎర్రకుంట చెరువుకు గండి పడింది. కుంటాల, పొచ్చర, బొగత జలపాతాలు జలకళతో పరవళ్లు తొక్కుతున్నాయి. ములుగు జిల్లా వాజేడు మండలంలో వాగు ఉప్పొంగడంతో తాత్కాలిక రహదారి కొట్టుకుపోయింది.

జగిత్యాల జిల్లా మెట్పల్లిలో వరదనీరు పట్టణంలోకి ప్రవేశించింది. ఒక ప్రాథమిక పాఠశాల జలమయమైంది. పోలీసు అధికారులు, స్థానికులు కలిసి విద్యార్థులను, ప్రజలను సురక్షిత ప్రాంతాలకు తరలించారు. నిజామాబాద్ జిల్లాలో వాగులు పొంగి పంట పొలాల్లోకి నీరు రావడంతో రైతులు ఆందోళన వ్యక్తం చేస్తున్నారు. మెదక్ జిల్లాలో గంగమ్మ వాగు ఉప్పొంగి రాకపోకలు నిలిచిపోయాయి.

ఆంధ్రప్రదేశ్‌లో ప్రధానంగా పోలవరం ప్రాజెక్టు పరిధిలోని చింతూరు ఏజెన్సీ ప్రాంతంలో వర్షాలు ఎక్కువగా నమోదయ్యాయి. పొల్లూరు జలపాతం ప్రమాదకరంగా మారడంతో అధికారులు పర్యాటకుల రాకపోకలపై ఆంక్షలు విధించారు. హైదరాబాద్‌లో రెండు రోజులుగా వర్షం పడుతోంది; నగరానికి ఎల్లో అలర్ట్ అమల్లో ఉంది.