ఉత్తర భారతంలో భారీ వర్షాలు: హిమాచల్‌లో కొండచరియలు, ఐదుగురి మృతి

ఉత్తర భారతంలో కురుస్తున్న భారీ వర్షాల కారణంగా ప్రజలు తీవ్ర ఇబ్బందులు ఎదుర్కొంటున్నారు. ఢిల్లీలో ఎడతెరిపి లేని వర్షాలు కురుస్తుండగా, హిమాచల్ ప్రదేశ్‌లో కొండచరియలు విరిగిపడుతున్నాయి. చంబా జిల్లాలో పదుల సంఖ్యలో వాహనాలు బురదలో కూరుకుపోయాయి. పలు ఇళ్లు దెబ్బతిన్నాయి, నివాసాల్లోకి బురద నీరు చేరడంతో స్థానికులు ఇబ్బందులు పడుతున్నారు.

భరమౌర్-పఠాన్కోట్ జాతీయ రహదారిపై లహార్ సమీపంలో ఒక కారు అదుపుతప్పి లోయలో పడింది. ఈ ప్రమాదంలో ఒకే కుటుంబానికి చెందిన ఐదుగురు మరణించారు. అనారోగ్యంతో ఉన్న చిన్నారిని ఆస్పత్రికి తరలిస్తుండగా ఈ దుర్ఘటన జరిగినట్లు తెలుస్తోంది.

మరోవైపు, ఉత్తరాఖండ్‌లో భారీ వర్షాల కారణంగా చార్ధాం యాత్ర నిలిచిపోయింది. వాతావరణం మెరుగుపడే వరకు యాత్ర కొనసాగించకూడదని నిర్ణయించారు. ప్రభావిత ప్రాంతాల్లో సహాయక చర్యలు కొనసాగుతున్నాయి.