నిజామాబాద్‌లో భారీ వర్షాలు, ఆరెంజ్ అలర్ట్; పాఠశాలలకు సెలవు ప్రకటించారు

ఉమ్మడి నిజామాబాద్ జిల్లాలో భారీ వర్షాలు కురుస్తున్నాయి. వాతావరణ శాఖ జిల్లాకు ఆరెంజ్ అలర్ట్ జారీ చేసింది. రాత్రి నుంచి ఎడతెరిపి లేకుండా వర్షం పడుతోంది.

వరద వల్ల వాగులు, వంకలు ఉదృతంగా ప్రవహిస్తున్నాయి. మోర్తాడు వద్ద పెద్ద వాగు ఉప్పొంగడంతో ధర్మోర, పాలెం గ్రామాల మధ్య రాకపోకలు నిలిచిపోయాయి. కొండూరు వద్ద అప్రోచ్ రోడ్ కొట్టుకుపోయింది. సిరికొండ మండల కేంద్రానికి రాకపోకలు నిలిచిపోయాయి.

శ్రీరామసాగర్ ప్రాజెక్టుకు 12,000 క్యూసెక్కుల ఇన్ఫ్లో వస్తోంది. నీటి మట్టం 1065 అడుగులు, పూర్తి స్థాయి 1091 అడుగులు. నిల్వ 17 టీఎంసీలు. నిజాంసాగర్ ప్రాజెక్టుకు 4,000 క్యూసెక్కుల ఇన్ఫ్లో ఉంది. నీటి మట్టం 1396 అడుగులు (పూర్తి స్థాయి 1405), నిల్వ 7 టీఎంసీలు. పోచారం ప్రాజెక్ట్ నీటి మట్టం 1464 అడుగులు, నిల్వ 1.820 టీఎంసీలు. ఎల్లారెడ్డిలోని కళ్యాణి ప్రాజెక్ట్ నిండి రెండు గేట్లు ఎత్తి నీటిని విడుదల చేస్తున్నారు.

భారీ వర్షాల నేపథ్యంలో నిజామాబాద్ జిల్లా వ్యాప్తంగా అన్ని ప్రభుత్వ, ప్రైవేట్ పాఠశాలలకు విద్యాశాఖ సెలవు ప్రకటించింది. మెండోరలో 115.6 మిల్లీమీటర్ల వర్షపాతం నమోదైంది.

జిల్లా కలెక్టర్లు ప్రజలు అత్యవసరమైతేనే బయటకు రావాలని సూచించారు. కంట్రోల్ రూమ్ ఏర్పాటు చేశారు. రెవెన్యూ, అగ్నిమాపక, పోలీసు శాఖలు సమన్వయంతో సహాయక చర్యలు చేపట్టాయి.