రానున్న మూడు రోజులు తెలంగాణలో భారీ వర్షాలు; హైదరాబాద్‌తో సహా 10 జిల్లాలకు ఎల్లో అలర్ట్

వాతావరణ శాఖ హెచ్చరిక ప్రకారం, తెలంగాణలో ఈ నెల 18 నుంచి మూడు రోజుల పాటు భారీ వర్షాలు కురిసే అవకాశం ఉంది. ముఖ్యంగా దక్షిణ తెలంగాణ జిల్లాలకు ఎల్లో అలర్ట్ జారీ చేసింది.

హైదరాబాద్, రంగారెడ్డి, మేడ్చల్ మల్కాజగిరి, వికారాబాద్, సంగారెడ్డి, మహబూబ్‌నగర్, నాగర్‌కర్నూల్, వనపర్తి, నారాయణపేట, జోగులాంబ గద్వాల జిల్లాలకు ఎల్లో అలర్ట్ జారీ చేశారు. ఈ జిల్లాల్లో భారీ వర్షాలు కురిసే అవకాశం ఉందని వాతావరణ శాఖ తెలిపింది.

ఉత్తర, మధ్య తెలంగాణ జిల్లాల్లో నేటి నుంచి మూడు రోజుల పాటు తేలికపాటి నుంచి ఓ మోస్తరు వర్షాలు కురుస్తాయని పేర్కొంది. నైరుతి రుతుపవనాలు ఈ నెల 8న రాష్ట్రంలోకి ప్రవేశించినప్పటికీ, వాటి పురోగమనం నెమ్మదించింది. ప్రస్తుతం పవనాలు హైదరాబాద్, భద్రాద్రి కొత్తగూడెం వరకు మాత్రమే విస్తరించాయి.

రాష్ట్రమంతటా విస్తరించేందుకు మరో నాలుగు రోజులు పట్టవచ్చని వాతావరణ శాఖ అంచనా. ఉమ్మడి నిజామాబాద్, ఆదిలాబాద్, కరీంనగర్ జిల్లాలను ఇంకా రుతుపవనాలు తాకకపోవడంతో అక్కడ ఎండ తీవ్రత కొనసాగుతోంది. ఆదివారం పెద్దపల్లి జిల్లా రామగుండంలో 42.5 డిగ్రీల ఉష్ణోగ్రత నమోదైంది. పలు ప్రాంతాల్లో 40 డిగ్రీలకు పైన ఉష్ణోగ్రతలు నమోదయ్యాయి.