రెండు తెలుగు రాష్ట్రాల్లో భారీ వర్షాలు; రేపు కూడా భారీ వర్ష సూచన

తెలంగాణ, ఆంధ్రప్రదేశ్ రాష్ట్రాల్లో భారీ వర్షాలు కురుస్తున్నాయి. బంగాళాఖాతంలో ఏర్పడిన తీవ్ర వాయుగుండం ప్రభావంతో రేపు కూడా భారీ వర్షాలు పడే అవకాశం ఉందని వాతావరణ శాఖ హెచ్చరించింది.

ఆదిలాబాద్, కొమరం భీం ఆసిఫాబాద్, మంచిర్యాల జిల్లాలతో పాటు ఉమ్మడి నిజామాబాద్ జిల్లాలో వర్షాలు ఎడతెరిపి లేకుండా కురుస్తున్నాయి. వాగులు, వంకలు పొంగి ప్రవహిస్తున్నాయి. లోతట్టు ప్రాంతాలు జలమయమయ్యాయి. పెద్దపల్లి జిల్లా నందిమేడారంలో నంది పంప్ హౌస్ వద్ద గోదావరి నీటి ఎత్తిపోతలను అధికారులు ప్రారంభించారు. 12,600 క్యూసెక్కుల నీటిని నంది రిజర్వాయర్లోకి విడుదల చేశారు. మహబూబ్నగర్ జిల్లా జూరాల ప్రాజెక్టుకు 21,000 క్యూసెక్కుల ఇన్ఫ్లో ఉంది. అవుట్ఫ్లో 32,806 క్యూసెక్కులుగా నమోదైంది. శ్రీరామసాగర్, నిజాంసాగర్ ప్రాజెక్టులకు భారీగా వరదనీరు వచ్చి చేరుతోంది.

ఏపీలో పోలవరం జిల్లా చింతూరు ఏజెన్సీ ప్రాంతంలో రెండు రోజులుగా భారీ వర్షాలు కురుస్తున్నాయి. వరద నీటి ప్రవాహంతో కొండవాగులు ప్రమాదకరంగా మారాయి. పలు పర్యాటక ప్రాంతాలను అధికారులు తాత్కాలికంగా మూసివేశారు. వరద పరిస్థితులు చల్లబడే వరకు పర్యాటకులు అక్కడికి రావద్దని సూచించారు.

బంగాళాఖాతంలోని తీవ్ర వాయుగుండం ప్రస్తుతం ఉత్తర ఒడిస్సా మీదుగా కదులుతోంది. రానున్న 24 గంటల్లో ఛత్తీస్గఢ్, మధ్యప్రదేశ్ వైపు పయనిస్తుందని అధికారులు అంచనా వేశారు. దీని ప్రభావంతో రేపు కోస్తాంధ్ర, రాయలసీమ ప్రాంతాల్లో పిడుగులు, తేలికపాటి నుంచి మోస్తరు వర్షాలు కురుస్తాయి. తీర ప్రాంతంలో గంటకు 40-50 కిలోమీటర్ల వేగంతో ఈదురుగాలులు వీచే అవకాశం ఉంది. ప్రజలు అప్రమత్తంగా ఉండాలని ఏపీ విపత్తుల నిర్వహణ సంస్థ హెచ్చరించింది.