తిరుమలలో భారీ రద్దీ: ఒక్క రోజులో 75,691 మంది శ్రీవారి దర్శనం

తిరుమలలో భక్తుల రద్దీ కొనసాగుతుంది. 31 కంపార్ట్మెంట్లలో భక్తులు వేచి ఉన్నారు. టోకెన్లు లేని వారికి సర్వదర్శనానికి 18 గంటల సమయం పడుతుందని TTD తెలిపింది.

నిన్న మొత్తం 75,691 మంది భక్తులు శ్రీవారిని దర్శించుకున్నారు. 39,050 మంది తలనీలాలు సమర్పించుకున్నారు. హుండీ ఆదాయం రూ. 4.16 కోట్లు వచ్చింది. 4.08 లక్షల లడ్డులు విక్రయించినట్లు TTD పేర్కొంది.

ప్రతిరోజూ దాదాపు 80 నుంచి 90 వేల మంది స్వామివారి దర్శనానికి తరలి వస్తున్నారు. సర్వదర్శనం టోకెన్ల కోసం తిరుపతిలో అర్ధరాత్రి నుంచే భక్తులు క్యూలు కాస్తున్నారు. 15 నుంచి 20 గంటల సమయం పట్టినా దర్శనం దొరకడం కష్టంగా మారింది.

వేసవి సెలవులు మరియు అనేక రాష్ట్రాల్లో ఎన్నికల కారణంగా రాలేకపోయిన భక్తులు ఇప్పుడు తిరుమలకు వస్తున్నారని TTD అధికారులు గుర్తించారు. ఇంకొక వారం రోజులు ఈ రద్దీ కొనసాగే అవకాశం ఉందని అధికారులు తెలిపారు.

కంపార్ట్మెంట్లలో అన్నప్రసాదాలు, మంచినీరు అందిస్తున్నారు. VIP దర్శనానికి సిఫారసు లేఖలు రద్దు చేయడం జరిగింది. కమాండ్ కంట్రోల్ సిస్టమ్ ద్వారా రద్దీని నిరంతరం పర్యవేక్షిస్తున్నారు.