తెలుగు రాష్ట్రాల్లో అధిక సాంద్రత పత్తి సాగుకు శాస్త్రవేత్తల సిఫార్సు

తెలుగు రాష్ట్రాల్లో పత్తి సాగు విధానంలో మార్పు కోసం శాస్త్రవేత్తలు అధిక సాంద్రత పద్ధతిని సిఫార్సు చేస్తున్నారు. ముఖ్యంగా వర్షాలు తక్కువగా ఉండే ఎర్ర నేలలు, తేలికపాటి భూములు ఉన్న ప్రాంతాల్లో ఇది ఎంతో ఉపయోగంగా ఉంటుందని కరీంనగర్ ఏరువాక కేంద్రం ప్రోగ్రామ్ కోఆర్డినేటర్ మదన్ మోహన్ రెడ్డి తెలిపారు.

సాంప్రదాయ పద్ధతిలో మొక్కల మధ్య ఎక్కువ దూరం ఉండడం వల్ల ఎకరాకు 5,000 నుంచి 7,000 మొక్కలు మాత్రమే నాటుతారు. ఈ పద్ధతిలో ఎర్ర నేలల్లో 6-8 క్వింటాళ్ల దిగుబడి, నల్ల రేగడి నేలల్లో 10-12 క్వింటాళ్ల దిగుబడి వస్తుంది. కానీ జనవరి-ఫిబ్రవరి నెలల్లో గులాబీ రంగు పురుగు ఉధృతంగా ఆశించి పంటను నష్టపరుస్తుంది.

అధిక సాంద్రత విధానంలో మొక్కకు మొక్కకు మధ్య దూరాన్ని 10-15 సెంటీమీటర్లకు తగ్గించి, వరుసల మధ్య 90 సెంటీమీటర్ల దూరం పాటిస్తారు. దీని వల్ల ఎకరాకు 29,000 నుంచి 44,000 మొక్కలు నాటవచ్చు. విత్తనం వాడకం 3-5 కేజీలకు పెరుగుతుంది.

పంట కాలంలో 40-45 రోజులకు, మళ్ళీ 65-75 రోజులకు మెపిక్వాట్ క్లోరైడ్ అనే గ్రోత్ రెగ్యులేటర్‌ను లీటర్ నీటికి 0.8-1 మి.లీ చొప్పున పిచికారి చేయాలి. ఇది మొక్కల ఎదుగుదలను నియంత్రించి కాయల పెరుగుదలకు తోడ్పడుతుంది. దీనికి అనువైన హైబ్రిడ్ రకాలు నూజువీడు అర్మిత, రాశి 929, స్విఫ్ట్, వేదాళ్ ప్లాటినం వంటివి. ఎత్తు 100 సెంటీమీటర్లకు మించకుండా, గుబురుగా కాకుండా ఉండే రకాలను ఎంచుకోవాలి.

ఈ పద్ధతి వల్ల ఎర్ర నేలల్లో దిగుబడి 6-8 క్వింటాళ్ల నుంచి 10-12 క్వింటాళ్లకు పెరుగుతుంది. పంట కాలం కూడా 180 రోజుల నుంచి 150-160 రోజులకు తగ్గడంతో రైతులు రబీ లేదా వేసవిలో మరో పంట వేసుకునే అవకాశం లభిస్తుంది. పెరిగిన దిగుబడి, తగ్గిన పెట్టుబడితో రైతులకు మంచి లాభాలు చేకూరుతాయని మదన్ మోహన్ రెడ్డి వివరించారు.