నాగార్జున సాగర్ శ్రీశైలం టైగర్ రిజర్వ్‌లో పులుల సంరక్షణకు హై పవర్డ్ కమిటీ ఏర్పాటు

నాగార్జున సాగర్ శ్రీశైలం టైగర్ రిజర్వ్ (NSTR) లో పులుల సంరక్షణ చర్యలను సమీక్షించేందుకు ఆంధ్రప్రదేశ్ ప్రభుత్వం హై పవర్డ్ కమిటీని ఏర్పాటు చేసింది. ఈ కమిటీలో రాష్ట్ర అటవీ శాఖ సలహాదారు పి. మల్లికార్జునరావు, అడిషనల్ పీసీసీఎఫ్ రాహుల్ పాండేలతో పాటు వరల్డ్ వైడ్ ఫండ్ ఫర్ నేచర్ (WWF) ప్రతినిధి బి. రాజశేఖర్, హైదరాబాద్ కన్జర్వేషన్ ఫర్ టైగర్ సొసైటీ ప్రతినిధి ఇమ్రాన్ సిద్దికి, వన్యప్రాణి శాస్త్రవేత్త డాక్టర్ ఎం. నవీన్ కుమార్ సభ్యులుగా ఉన్నారు.

మార్కాపురం జిల్లా గిద్దలూరు అటవీ ప్రాంతంలో రెండు రోజుల క్రితం ఒక ఆడపులి అనుమానాస్పదంగా మృతి చెందింది. ఈ ఘటనపై ఉప ముఖ్యమంత్రి పవన్ కళ్యాణ్ తీవ్రంగా స్పందించారు. క్షేత్ర స్థాయిలో పులులు, వాటి ఆవాసాల సంరక్షణపై సమగ్ర అధ్యయనం చేయాలని ఆదేశించారు. ఆయన సూచనలతోనే ఈ హై పవర్డ్ కమిటీ ఏర్పాటైంది.

ఈ కమిటీ పులులతో పాటు ఇతర వన్యప్రాణుల సంరక్షణ చర్యలను కూడా సమీక్షించనుంది. భవిష్యత్తు కార్యాచరణకు మార్గదర్శకాలు రూపొందించడం దీని లక్ష్యం. NSTR దేశంలోని అతిపెద్ద పులుల ఆవాసాలలో ఒకటని అధికారులు పేర్కొన్నారు.