కంది సాగులో అధిక దిగుబడి: రైతులకు శాస్త్రవేత్త సూచనలు

వరంగల్ ప్రాంతీయ వ్యవసాయ పరిశోధన స్థానం శాస్త్రవేత్త డాక్టర్ సంధ్యా కిషోర్ కంది సాగులో అధిక దిగుబడి సాధించడానికి అవసరమైన యాజమాన్య పద్ధతులను వివరించారు. గత సంవత్సరం తెలంగాణలో 10 లక్షల ఎకరాలకు పైగా కంది సాగు జరిగింది. డిమాండ్‌కు తగ్గ ఉత్పత్తి లేకపోవడం ఒక ముఖ్యమైన సమస్యగా ఉంది.

ఖరీఫ్ కందిని జూలై 15 వరకు విత్తుకోవచ్చు. తేలికపాటి ఎర్ర నేలల్లో స్వల్పకాలిక రకాలైన PRG 176, వరంగల్ కంది-1, RJG 97 వాడాలి. నల్లరేగడి నేలల్లో మధ్యకాలిక రకాలైన ICP 8863 (రుద్రేశ్వర), ఆశ, మారుతి, లక్ష్మి వాడాలి. ఎండు తెగులు తట్టుకొనే రకాలైన వరంగల్ కంది-1, రుద్రేశ్వర, ఆశ రకాలనే ఎంచుకోవాలి.

ఎకరాకు 2 నుండి 3 కిలోల విత్తనం సరిపోతుంది. చివరి దుక్కులో రెండు టన్నుల మాగిన పశువుల ఎరువు, 50 కిలోల DAP వేయాలి. 2 కిలోల Phospho Bacteria (PSB)ను 200 కిలోల పశువుల ఎరువుతో కలిపి చివరి దుక్కిలో వేయాలి. విత్తనాలు వేసే ముందు Trichoderma తో విత్తన శుద్ధి చేయాలి. కంది పంట మొదటిసారి వేసే రైతులు Rhizobium culture తప్పకుండా వాడాలి.

తేలికపాటి నేలల్లో సాళ్ల మధ్య 90–120 సెంటీమీటర్లు, మొక్కల మధ్య 20 సెంటీమీటర్ల దూరం పాటించాలి. నల్లరేగడి నేలల్లో సాళ్ల మధ్య 150–180 సెంటీమీటర్ల దూరం అవసరం. విత్తిన 24–36 గంటల లోపు Pendimethalin కలుపు మందు ఎకరాకు 1.3 నుండి 1.6 లీటర్లు పిచికారి చేయాలి. 20 రోజుల వయసులో వెడల్పాటి ఆకు కలుపు ఉంటే Imazethapyr 300 మిల్లీలీటర్లు వాడాలి. గడ్డి జాతి కలుపుకు Quizalofop-P-Ethyl 400 మిల్లీలీటర్లు పిచికారి చేయాలి.

పూత దశ మరియు కాయ ఊరే దశలో తేలికపాటి తడులు ఇవ్వాలి. శాస్త్రీయ పద్ధతులు పాటిస్తే ఎకరాకు 8 నుండి 10 క్వింటాళ్ల దిగుబడి సాధించవచ్చు.