హిమాయత్ సాగర్ నీటి నిల్వలు వేసవి వరకు సరిపోతాయి: డీజీఎం గోవింద్ గౌడ్

హైదరాబాద్ నగరానికి రోజుకు 25 మిలియన్ గ్యాలన్ల నీటిని ఉస్మాన్ సాగర్, హిమాయత్ సాగర్ జలాశయాల నుంచి సరఫరా చేస్తున్నట్లు అధికారులు తెలిపారు. ఇందులో హిమాయత్ సాగర్ నుంచి రోజుకు 13 మిలియన్ గ్యాలన్లు సరఫరా అవుతోంది.

హిమాయత్ సాగర్ డీజీఎం గోవింద్ గౌడ్ మాట్లాడుతూ, ప్రస్తుతం జలాశయంలో 2.2185 టీఎంసీల నీటి నిల్వ ఉందని, నీటి మట్టం 1761.10 అడుగులుగా ఉందని తెలిపారు. గతేడాదితో పోలిస్తే నీటి లభ్యత ఇప్పుడు మెరుగ్గా ఉందని, ఈ ఏడాది చివర్లో కురిసిన వర్షాలతో 0.33 టీఎంసీల నీరు అదనంగా చేరిందని వివరించారు.

హైదరాబాద్‌కు ప్రధాన నీటి సరఫరా కృష్ణా, గోదావరి ప్రాజెక్టుల నుంచి జరుగుతున్నా, అత్యవసర సమయాల్లో ఉస్మాన్ సాగర్, హిమాయత్ సాగర్ నీళ్లు కీలకమని అధికారులు పేర్కొన్నారు. ప్రస్తుతం నీటి నిల్వలు వచ్చే ఏడాది వేసవి వరకు సరిపోతాయని, అవసరమైతే వర్షాలు వచ్చే వరకు సరఫరా కొనసాగించవచ్చని డీజీఎం గోవింద్ గౌడ్ స్పష్టం చేశారు.

జలాశయం నుంచి నీటి విడుదలపై మాట్లాడుతూ, నీటి మట్టం 1761.25 అడుగులు దాటితేనే అధికారుల అనుమతితో నీరు డిశ్చార్జీ చేస్తామని, ప్రస్తుతం ఆ స్థాయి లేదని తెలిపారు. నగరంలోని మిరాలం ఫిల్టర్ బెడ్ వద్ద శుద్ధి చేసిన తర్వాత కిషన్‌బాగ్, బహదూర్‌పురా ప్రాంతాలకు నీరు పంపిణీ చేస్తున్నట్లు చెప్పారు.