మనుగూరు ATC విద్యార్థులు స్క్రాప్‌తో రెండు ఎలక్ట్రిక్ ఫోర్-వీలర్లు తయారు

భద్రాద్రి కొత్తగూడెం జిల్లా మనుగూరులోని ప్రభుత్వ ATC సెంటర్ విద్యార్థులు పాత ఇనుము వ్యర్థాలతో రెండు ఎలక్ట్రిక్ ఫోర్-వీలర్ వాహనాలను రూపొందించారు. ఇందులో ఒక వాహనాన్ని విద్యార్థిని స్ఫూర్తి తయారు చేశారు. మరో ద్వంద్వ వినియోగ వాహనాన్ని పులిపాటి పార్దసారధి సిద్ధం చేశారు.

మెకానిక్ ఎలక్ట్రిక్ వెహికల్ ట్రేడ్లో శిక్షణ పొందుతున్న స్ఫూర్తి ఈ వాహనాన్ని ₹45,000 ఖర్చుతో నిర్మించారు. పాత బైక్ విడిభాగాలు, స్క్రాప్ మెటీరియల్ ఉపయోగించారు. ఇందులో 48V 750W BLDC మోటార్, నాలుగు లెడ్ యాసిడ్ బ్యాటరీలు, DC కన్వర్టర్, ప్రొపెల్లర్ షాఫ్ట్, డ్రమ్ బ్రేకింగ్ సిస్టమ్ ఉన్నాయి. ఈ వాహనం కాలుష్య రహితంగా నడుస్తుందని స్ఫూర్తి తెలిపారు.

పులిపాటి పార్దసారధి గిరిజన, గనుల ప్రాంత అవసరాలకు అనుగుణంగా ₹65,000 ఖర్చుతో డ్యూయల్ పర్పస్ ఎలక్ట్రిక్ ఫోర్-వీలర్ నిర్మించారు. ఇందులో లిథియం అయాన్ బ్యాటరీ ప్యాక్, 48V 1250W BLDC మోటార్, 50 ఆంపియర్ కంట్రోలర్ ఉన్నాయి. స్టీరింగ్ రాక్, డిఫరెన్షియల్ సిస్టమ్‌తో బలమైన చాసిస్ కూడా అమర్చారు. ఈ వాహనం నలుగురు ప్రయాణికులను లేదా 200 కిలోల వరకు సరుకును తీసుకెళ్లగలదు.

ఈ వాహనాల తయారీలో ఫాబ్రికేషన్, వెల్డింగ్, వైరింగ్, బ్యాటరీ మేనేజ్‌మెంట్ నైపుణ్యాలను విద్యార్థులు స్వయంగా నేర్చుకున్నారు. వాహనం వేగం, లోడు మోసే సామర్థ్యం, బ్రేకింగ్, బ్యాటరీ పనితీరుపై పలుమార్లు పరీక్షలు నిర్వహించినట్టు పార్దసారధి తెలిపారు. ప్రాక్టికల్ ట్రబుల్ షూటింగ్ ద్వారా లోపాలను సరిదిద్దుకున్నామని ఆయన చెప్పారు.

రాష్ట్ర ప్రభుత్వం ఐటీఐలను అడ్వాన్స్డ్ టెక్నాలజీ సెంటర్లుగా ఆధునీకరించింది. ప్రాజెక్ట్ ఆధారిత శిక్షణ అందిస్తోంది. దీంతో పరిశ్రమల అవసరాలకు తగిన ప్రయోగాలు చేయడం సాధ్యమవుతోందని విద్యార్థులు చెబుతున్నారు. ఈ వాహనాలు అంతర్గత రవాణా, తేలికపాటి సరుకుల రవాణాకు ఉపయోగపడతాయని వారు వివరించారు.