హిందూపురంలో రసాయన వ్యర్థాల డంపింగ్: నివాసితుల ఆందోళన, చర్యలు తీసుకోవాలని డిమాండ్

శ్రీ సత్యసాయి జిల్లా హిందూపురంలోని పారిశ్రామిక వార్డులో ఉన్న ఆర్ఎఫ్ఎల్ఎఫ్సి (RFLFC) కంపెనీ నుంచి వెలువడే రసాయన వ్యర్థాలను రోడ్లపై, ఖాళీ స్థలాలపై డంపింగ్ చేస్తున్నట్లు స్థానికులు ఆరోపిస్తున్నారు.

దీనివల్ల పరిసర ప్రాంతాల్లో దుర్వాసన వ్యాపిస్తోందని, ప్రజలు ఆరోగ్య సమస్యలు ఎదుర్కొంటున్నారని వారు పేర్కొన్నారు. వర్షాకాలంలో ఈ వ్యర్థాలు నీటితో కలిసి భూగర్భ జలాలు కలుషితమయ్యే ప్రమాదం ఉందని ఆందోళన వ్యక్తం చేస్తున్నారు.

పారిశ్రామిక వాడలోని తూమకుంట చెరువు, ఇతర నీటి వనరుల్లో ఈ వ్యర్థాలు చేరడంతో, ఆ నీరు తాగిన పశువులు చనిపోయిన ఘటనలు చోటు చేసుకున్నాయని స్థానికులు తెలిపారు.

తాము పలు మార్లు పొల్యుషన్ కంట్రోల్ బోర్డు, మున్సిపల్ అధికారులు, జిల్లా కలెక్టర్‌తో సహా వివిధ అధికారులకు ఫిర్యాదు చేసినప్పటికీ స్పందన లేదని వారు ఆరోపించారు. కంపెనీ యాజమాన్యం మారిన తర్వాత కూడా ఎలాంటి మార్పు లేదని, రీసైక్లింగ్ చేయాలని కోరుతున్నా రాత్రిపూటల ట్యాంకర్ల ద్వారా వ్యర్థాలను తీసుకువెళ్లి నిర్మాణ స్థలాల్లో, చెరువుల్లో వేస్తున్నారని ఆరోపించారు.

అధికారులు వెంటనే స్పందించి ఈ పరిశ్రమపై కఠిన చర్యలు తీసుకోవాలని, రీసైక్లింగ్ ప్రక్రియలను పక్కాగా అమలు చేయించాలని స్థానికులు డిమాండ్ చేశారు.