హిందూపురంలో గర్భిణి మృతి: ప్రభుత్వ ఆసుపత్రి నుండి ప్రైవేట్ క్లినిక్‌కు రిఫర్ చేశారని బంధువుల ఆరోపణ

శ్రీ సత్యసాయి జిల్లా హిందూపురంలో ప్రసవం కోసం వచ్చిన గర్భిణి మృతి చెందింది. పరిగి మండలం బీచగానిపల్లి గ్రామానికి చెందిన రమేశ్వరి అనే మహిళ నిన్న సాయంత్రం హిందూపురం ప్రభుత్వ ఆసుపత్రికి వచ్చారు.

అక్కడ గైనకాలజిస్ట్ గా విధులు నిర్వహిస్తున్న డాక్టర్ బాబు బుడెన్ ఆశా వర్కర్ల ద్వారా తన ప్రైవేట్ క్లినిక్‌కు రిఫర్ చేశారని, ఆ క్లినిక్‌లో చికిత్స పొందుతూ ఆమె మృతి చెందిందని బంధువులు ఆరోపిస్తున్నారు. వైద్యుడి నిర్లక్ష్యం కారణంగానే ఈ ఘటన జరిగిందని వారు పేర్కొంటున్నారు.

మృతదేహాన్ని ప్రభుత్వ ఆసుపత్రికి తరలించారు. బంధువులు, స్థానికులు ఆసుపత్రి, ప్రైవేట్ క్లినిక్ ఎదుట పెద్ద ఎత్తున ఆందోళన చేపట్టారు. డాక్టర్ లైసెన్స్ రద్దు చేయాలని, కఠిన చర్యలు తీసుకోవాలని డిమాండ్ చేశారు.

పోలీసులు ఘటనపై కేసు నమోదు చేసి దర్యాప్తు ప్రారంభించినట్లు సమాచారం. ఈ విషయంపై డాక్టర్ బాబు లేదా ఆసుపత్రి యాజమాన్యం స్పందన తెలియాల్సి ఉంది.