హర్మూజ్‌లో 6 వేల మంది నావికులు చిక్కుకుపోయారు; 28 మంది భారతీయులతో నౌకపై క్షిపణి దాడి

హార్మూస్ జలసంధి ప్రాంతంలో కొనసాగుతున్న ఉద్రిక్తతల కారణంగా వందలాది నౌకలు నిలిచిపోయాయి. ఈ పరిస్థితిలో సుమారు 6,000 మంది నావికులు అక్కడ చిక్కుకుపోయినట్లు అంతర్జాతీయ సముద్రయాన సంస్థ (IMO) వెల్లడించింది. ప్రపంచ ఇంధన సరఫరాలో కీలకమైన ఈ మార్గంలో రాకపోకలు మందగించడంతో పలు దేశాలు ఆందోళన వ్యక్తం చేస్తున్నాయి.

ఇదిలావుండగా, ఇరాన్ జలాల్లో ఒక ఎల్పిజీ ట్యాంకర్‌పై క్షిపణి దాడి జరిగింది. మొజాంబిక్ పతాకంతో ప్రయాణిస్తున్న ‘ది షా’ (Disha) నౌకపై జరిగిన ఈ దాడిలో 28 మంది భారతీయ నావికులు ఉన్నారు. భారత రాయబార కార్యాలయం ఇరాన్ అధికారులను సంప్రదించగా, భారతీయులందరూ సురక్షితంగా ఉన్నట్లు తెలిసింది. నౌకపై దాడికి ముందు అమెరికా సైనిక ఆపరేటర్ నుంచి వచ్చిన హెచ్చరిక ఆడియో రికార్డులు బయటపడ్డాయి. ఇరాన్ జలాల్లోకి ప్రవేశించవద్దని, లేదంటే ఇంజన్ రూమ్‌పై దాడి చేస్తామని ఆ ఆడియోలో చెప్పినట్లు తెలుస్తోంది. హెచ్చరిక అనంతరం కాసేపటికే నౌకపై గుర్తుతెలియని క్షిపణులతో దాడి జరిగింది. అత్యవసర సహాయం కావాలంటూ నౌక నుంచి డిస్ట్రెస్ కాల్ వచ్చింది.

భారత ప్రభుత్వం ఇప్పటికే హార్మూస్ జలసంధి మీదుగా వెళ్లే నౌకల్లో భారతీయ నావికులను నియమించవద్దని నౌకాయాన సంస్థలను ఆదేశించింది. అయినప్పటికీ 28 మంది భారతీయులతో ప్రయాణిస్తున్న నౌకపై ఈ దాడి జరగడం అంతర్జాతీయ సముద్ర రంగంలో ఆందోళనకు దారితీసింది.