పెట్రోల్ ధరల పెరుగుదలతో CNG, ఎలక్ట్రిక్ వాహనాల వైపు వినియోగదారులు – మారుతి, టాటా, హ్యుందాయ్లలో పెరిగిన రిజిస్ట్రేషన్లు

పెట్రోల్, డీజిల్ ధరలు నిరంతరం పెరుగుతుండటంతో భారతీయ వినియోగదారులు ప్రత్యామ్నాయ ఇంధనంపై నడిచే వాహనాల వైపు మళ్లుతున్నారని వాహన రిజిస్ట్రేషన్ల డేటా స్పష్టం చేస్తోంది. వెస్ట్ ఆసియా సంక్షోభం నేపథ్యంలో ఫిబ్రవరి 20 నుంచి పెట్రోల్, డీజిల్ ధరలు పెరగడంతో CNG, ఎలక్ట్రిక్ వెహికల్ (EV) రిజిస్ట్రేషన్లు గణనీయంగా పెరిగాయి. ప్రధాని నరేంద్ర మోదీ ప్రసంగం తర్వాత EV బుకింగ్లు రెట్టింపు కాగా, CNG బుకింగ్లు కూడా వేగంగా పెరిగినట్లు మారుతి సుజుకీ యాజమాన్యం తెలిపింది.

వాహన పోర్టల్ నుంచి లభించిన డేటా ప్రకారం, మారుతి కంపెనీ మొత్తం రిజిస్ట్రేషన్లలో CNG వాహనాల వాటా మార్చిలో 44.35%, ఏప్రిల్‌లో 42.20%, మే నెలలో 42.33%గా నమోదైంది. అంటే ప్రతి నెల 40% పైగా రిజిస్ట్రేషన్లు ప్రత్యామ్నాయ ఇంధన వాహనాలదే. టాటా మోటార్స్ విషయంలో CNG వాటా మార్చిలో 31.48%, ఏప్రిల్‌లో 29.06%, మేలో 28.23% ఉండగా, ఇదే కాలంలో EV వాహనాల వాటా 15.54% నుంచి 21.30% మధ్య ఉంది. హ్యుందాయ్ మోటార్స్ లో CNG రిజిస్ట్రేషన్లు మార్చిలో 21.64%, ఏప్రిల్‌లో 20.35%, మేలో 20.94% కాగా, EV వాటా 1.22% నుంచి 1.42% మాత్రమే.

ఇంధన ధరల పెరుగుదల కారణంగా వినియోగదారుల్లో ఈ షిఫ్ట్ క్రమంగా జరుగుతోందని, పెట్రోల్, డీజిల్, CNG ధరల హెచ్చుతగ్గుల వల్ల ఈ మార్పు వేగవంతమైందని విశ్లేషకులు పేర్కొంటున్నారు. కేంద్ర ప్రభుత్వం ఇథనాల్, బ్యాటరీ వంటి ప్రత్యామ్నాయ ఇంధన విధానాలపై దృష్టి పెట్టడం కూడా ఈ దిశగా మరింత ఊపునిచ్చింది.