కేపీహెచ్పీ కాలనీలో అక్రమ ఫుట్‌పాత్ నిర్మాణాలు కూల్చివేత

హైదరాబాద్‌లోని కేపీహెచ్పీ కాలనీలో ఫుట్‌పాత్‌లపై ఏర్పాటు చేసిన అక్రమ నిర్మాణాలు, వ్యాపారాలను అధికారులు శుక్రవారం కూల్చివేశారు. స్థానికుల ఫిర్యాదు మేరకు ఈ చర్య తీసుకున్నారు.

జీహెచ్ఎంసీ, సైబరాబాద్ మున్సిపల్ కార్పొరేషన్ అధికారులు పోలీసు సమక్షంలో కూల్చివేతలు చేపట్టారు. ఫుట్‌పాత్‌లపై వ్యాపారాల కోసం ఏర్పాటు చేసిన డబ్బాలు, టిఫిన్ సెంటర్లు, ఇతర నిర్మాణాలను తొలగించారు.

ఫుట్‌పాత్ ఆక్రమణలపై హైకోర్టు ఇటీవల తీవ్ర అసహనం వ్యక్తం చేసిన నేపథ్యంలో జీహెచ్ఎంసీతోపాటు సైబరాబాద్, మల్కాజిగిరి మున్సిపల్ కార్పొరేషన్లు ప్రత్యేక దృష్టి సారించాయి. టౌన్ ప్లానింగ్ సిబ్బంది ముందస్తు నోటీసులు ఇచ్చినా స్పందించని వారి నిర్మాణాలను పోలీసు సహకారంతో తొలగిస్తున్నట్టు అధికారులు తెలిపారు.