హైదరాబాద్‌లో బోనాల ఉత్సవాలకు ఏర్పాట్లు, రూ.20 కోట్ల బడ్జెట్; జూలై 15 నుంచి ప్రారంభం

హైదరాబాద్‌లో ఆషాఢ బోనాల ఉత్సవాలకు భారీ ఏర్పాట్లు జరుగుతున్నాయి. ఓల్డ్ సిటీతో పాటు 3,300 ఆలయాల్లో పెయింటింగ్ పనులు కొనసాగుతున్నాయి. బోనాల జాతరను ఘనంగా నిర్వహించేందుకు రాష్ట్ర ప్రభుత్వం ₹20 కోట్ల బడ్జెట్ విడుదల చేసింది.

మంత్రులు, ఉన్నతాధికారులు ఇప్పటికే అన్ని శాఖలతో సమీక్ష నిర్వహించారు. భక్తులకు ఎలాంటి ఇబ్బంది కలగకుండా చర్యలు తీసుకోవాలని ఆదేశించారు.

లాల్ దర్వాజా సింహవాహిని మహాంకాళి, ఉప్పుగూడ మహాంకాళి, సుల్తాన్‌షాహి జగదంబిక, గౌలీపుర నల్లపోచమ్మ వంటి ప్రధాన ఆలయాల్లో బోనాలతో పాటు భవిష్యవాణి నిర్వహిస్తారు. మెహరాలం మండి మహాంకాళేశ్వరి ఆలయం చైర్మన్ గాజులు అంజయ్య మాట్లాడుతూ, ఈ నెల 15న మహాభిషేకం, ఆగస్టు 5న శాఖంబరి అలంకారం, 8న పూలంగి సేవ, 9న బోనాల జాతర, 10న రంగం, 11న అమ్మవారికి మారుబోనం ఇస్తామని తెలిపారు. బోనాలతో పాటు వారాహి నవరాత్రులు కూడా నిర్వహిస్తామన్నారు.

ఉమ్మడి దేవాలయాల ఊరేగింపు కమిటీ చైర్మన్ మధుసూధన్ తెలిపిన వివరాల ప్రకారం, మెహరాలం మండి నుంచి అమ్మవారి ఘటాల ఊరేగింపు జరుగుతుంది. ఇది చార్మినార్, పత్తర్ గట్టి, నాయాపూల్, దిల్లీ దర్వాజా మీదుగా సాగుతుంది. 400 మంది కళాకారులు, 27 వాహనాలు, 10 రోడ్‌షో గ్రూపులు ఇందులో పాల్గొంటాయి.

గత 16 ఏళ్లుగా కొనసాగుతున్న సంప్రదాయం ప్రకారం సప్తమాతృకలకు బంగారు బోనాలు సమర్పిస్తారు. జూలై 16న గోల్కొండ జగదంబ ఆలయం, 19న జూబ్లీహిల్స్ పెద్దమ్మ ఆలయం, 22న బల్కంపేట ఎల్లమ్మ ఆలయంలో బంగారు పాత్రలో బోనం సమర్పించనున్నారు. 26న విజయవాడ కనకదుర్గ ఆలయంలో కూడా బంగారు బోనాలు సమర్పించి, రెండు తెలుగు రాష్ట్రాల ప్రజల సుభిక్షం కోసం సందేశం ఇవ్వాలని నిర్ణయించినట్లు మధుసూధన్ తెలిపారు.

బోనాల ఉత్సవాలకు రాష్ట్ర ప్రభుత్వం ప్రత్యేక నిధులతో పాటు, అన్ని శాఖలు సమన్వయంగా పనిచేస్తున్నాయి. ప్రధాన ఆలయాల అమ్మవార్లకు మంత్రులు పట్టు వస్త్రాలు అందజేయనున్నారు.