హైదరాబాద్: గోల్కొండ జగదాంబ ఆలయంలో బోనాల జాతర షురూ; భక్తుల పోటెత్తు

హైదరాబాద్ లోని గోల్కొండ కోటలోని జగదాంబికమ్మ ఆలయంలో గురువారం బోనాల జాతర వైభవంగా ప్రారంభమైంది. తొలి బోనం కోసం వేలాది మంది భక్తులు పోటెత్తారు. ఈ సందర్భంగా మంత్రులు, ప్రజా ప్రతినిధులు అమ్మవారికి పట్టు వస్త్రాలు సమర్పించారు.

భక్తులు బోనాలు ఎత్తుకుని ఊరేగింపులు నిర్వహించారు. పోతరాజు వేషాలు, శివ సత్తుల నృత్యాలు, తొట్టెల ఊరేగింపులతో ఆలయం సందడిగా మారింది. ఒక ముస్లిం కుటుంబం 14 ఏళ్లుగా బోనం సమర్పిస్తోంది. ఈ సారి కూడా వారు భక్తితో తల్లికి బోనం పెట్టారు.

ఆంధ్రా నుంచి వచ్చిన ఓ భక్తురాలు తనకు కలలో అమ్మవారు కనిపించి గోల్కొండలో తొలి బోనం ఎక్కించమని చెప్పడంతో ఆమె ఆ కార్యక్రమంలో పాల్గొన్నారు. మరికొందరు భక్తులు కోళ్లు, మేకలను బలి ఇచ్చి ప్రత్యేక పూజలు చేశారు. భక్తులు పెద్ద సంఖ్యలో కోటపైకి వెళ్లి అమ్మవారిని దర్శించుకున్నారు. బోనాల జాతర ఈ నెలాఖరు వరకు వివిధ ఆలయాల్లో కొనసాగుతుంది.