చెంగిచెర్ల నీటి సమస్యలకు వారం రోజుల్లో పరిష్కారం: అధికారులు

హైదరాబాద్‌లోని చెంగిచెర్ల డివిజన్ పరిధిలోని పలు కాలనీల్లో నీటి సరఫరా సమస్యలు తీవ్రంగా ఉన్నాయి. చిన్న పైపు లైన్ల వల్ల నీటి ఒత్తిడి తక్కువగా ఉండటంతో ప్రజలు ఇబ్బందులు పడుతున్నారు.

ఈ నేపథ్యంలో మాజీ కార్పొరేటర్ బింగా జంగయ్య ఆధ్వర్యంలో స్థానికులు మేడ్చెల్ డిసిపి అధ్యక్షుడు తోటకూర వజ్రేష్ యాదవ్, మాజీ మేయర్ అజయ్ యాదవ్‌కు వినతిపత్రం సమర్పించారు. నీటి ఎద్దడిని తీవ్రంగా పరిగణించిన వజ్రేష్ యాదవ్ వెంటనే వాటర్ వర్క్స్ ఎండి అశోక్ రెడ్డితో చర్చించారు.

ప్రధాన పైప్‌లైన్ మార్చాల్సిన అవసరం ఉందని, ఏయే ప్రాంతాల్లో ఏ సమస్యలు ఉన్నాయో అంచనా వేయాలని అధికారులకు సూచించారు. స్పందించిన అధికారులు సమగ్ర అంచనా తర్వాత వారం నుంచి పది రోజుల్లో సమస్యను పరిష్కరిస్తామని హామీ ఇచ్చారు. బోడుప్పల్, చెంగిచెర్ల ప్రాంతాలపై ముఖ్యమంత్రి రేవంత్ రెడ్డికి ప్రత్యేక శ్రద్ధ ఉందని, త్వరలో నీటి సరఫరా పెంచే చర్యలు తీసుకుంటామని అధికారులు తెలిపారు.

నీటి సమస్యపై ధర్నా చేస్తామని ఆ ప్రాంత ఎమ్మెల్యే బండారి లక్ష్మారెడ్డి చేసిన వ్యాఖ్యలు విడ్డూరంగా ఉన్నాయని కాంగ్రెస్ నాయకులు అభిప్రాయపడ్డారు. ప్రజల సమస్యలు పరిష్కరించడమే కాంగ్రెస్ లక్ష్యమని వారు స్పష్టం చేశారు.