హైదరాబాద్‌లో చికెన్, గుడ్ల ధరలు పెరిగాయి; కిలో చికెన్‌కు ₹60, గుడ్డుకు ₹2 అదనం

హైదరాబాద్ నగరంలో చికెన్, గుడ్ల ధరలు అకస్మాత్తుగా పెరిగాయి. కిలో చికెన్ ధర ₹60 పెరగడంతో ఇప్పుడు ₹340 – ₹360 మధ్య విక్రయిస్తున్నారు. ఒక గుడ్డు ధర ₹2 పెరిగి రిటైల్ మార్కెట్లో ₹8 నుంచి ₹9 చేరింది.

వేసవి తీవ్రతకు కోళ్లు మేత తినలేక నీరసించి మరణిస్తున్నాయని, దీంతో గుడ్ల ఉత్పత్తి బాగా తగ్గిందని పౌల్ట్రీ వ్యాపారులు తెలిపారు. రాష్ట్రంలో ఉత్పత్తి అయ్యే కోడి గుడ్లలో సగం మహారాష్ట్ర, ఉత్తరప్రదేశ్, పశ్చిమ బెంగాల్ లాంటి రాష్ట్రాలకు ఎగుమతి చేయడం కూడా కొరతకు కారణమన్నారు.

అదనంగా పశుగ్రాసం ధరలు, రవాణా ఖర్చులు, మందుల ధరలు కూడా పెరగడంతో నష్టాలు భరించలేకపోతున్నామని వ్యాపారులు వాపోయారు. ధరలు పెరగడంతో చాలా మంది వినియోగదారులు తక్కువ పరిమాణంలో కొనుగోలు చేస్తున్నారు.

వర్షాలు పడి వాతావరణం చల్లబడితే కోళ్ల ఉత్పత్తి పెరిగి ధరలు తగ్గొచ్చని వ్యాపారులు ఆశాభావం వ్యక్తం చేశారు.