హైదరాబాద్‌లో RTC బస్సు సర్వీసులు పెంచాలని ప్రయాణికుల డిమాండ్

హైదరాబాద్‌లో RTC బస్సుల సేవలు సరిపడటం లేదని, రద్దీ పెరగడంతో ప్రయాణికులు తీవ్ర ఇబ్బందులు పడుతున్నారు. రోజుకు 3,000 బస్సులు నడుస్తున్నా దాదాపు 25 లక్షల మంది ప్రయాణిస్తుండడంతో సీట్లు కూడా దొరకడం లేదని ప్రయాణికులు చెబుతున్నారు.

మహిళలకు ఉచిత బస్సు ప్రయాణ సౌకర్యం ఉండటంతో రద్దీ మరింతగా పెరిగింది. టిక్కెట్ కొన్న ప్రయాణికులకు నిలబడటానికి కూడా చోటు దొరకడం కష్టంగా మారింది. ముఖ్యంగా ఉదయం, సాయంత్రం వేళల్లో ఆఫీసులు, కాలేజీలకు వెళ్లే వారు ఎక్కువ ఇబ్బంది పడుతున్నారు.

TSRTC రూపొందించిన ట్రాకింగ్ యాప్ సరిగా పని చేయడం లేదని, యాప్‌లో చూపిన సమయానికి బస్సులు రావడం లేదని ఫిర్యాదులు ఉన్నాయి. బస్సులు లేకపోవడంతో చాలా మంది ఆటోలను ఆశ్రయించాల్సి వస్తోంది.

పెరుగుతున్న రద్దీని దృష్టిలో ఉంచుకుని బస్సుల సంఖ్య పెంచాలని, సమయపాలన మెరుగుపరచాలని ప్రయాణికులు డిమాండ్ చేస్తున్నారు. ఈ విషయంపై TSRTC అధికారుల నుంచి ఇప్పటివరకు స్పందన లేదు.