ప్రపంచ సైకిల్ దినోత్సవం: హైదరాబాద్‌లో 250 మందితో రూపాయి గుర్తు

ప్రపంచ సైకిల్ దినోత్సవం (జూన్ 3) సందర్భంగా హైదరాబాద్‌లో హైదరాబాద్ సైక్లింగ్ రివల్యూషన్ 'Raid for Bharat' కార్యక్రమం నిర్వహించింది. ఈ కార్యక్రమంలో 250 మందికి పైగా సైక్లిస్టులు, రన్నర్లు పాల్గొని భారీ మానవ భారత రూపాయి గుర్తును ఏర్పాటు చేశారు.

ప్రధాని నరేంద్ర మోదీ ఇంధన వినియోగాన్ని తగ్గించాలని ఇచ్చిన పిలుపు మేరకు ఈ కార్యక్రమం చేపట్టినట్లు నిర్వాహకులు తెలిపారు.

ఈ సందర్భంగా చిన్నారులకు ఫ్యాన్సీ డ్రెస్ పోటీలు నిర్వహించారు. పిల్లలు ఫిట్నెస్, దేశభక్తి, పర్యావరణ పరిరక్షణ, ఆరోగ్యకర జీవన విధానాల వంటి అంశాలను ప్రదర్శించారు.

సైక్లిస్టులు యాక్టివ్ మొబిలిటీ ప్రతిజ్ఞ చేశారు. రోజువారీ చిన్నచిన్న ప్రయాణాలకు సైకిల్, నడక, ప్రజారవాణను ఉపయోగించడం ద్వారా ఇంధన వినియోగం తగ్గుతుందని, దీంతో విదేశీ మారక ద్రవ్యం ఆదా అయి రూపాయి విలువ బలపడుతుందని నిర్వాహకులు పేర్కొన్నారు. సైక్లింగ్ వ్యక్తిగత ఆరోగ్యానికే కాక దేశ ఆర్థికాభివృద్ధికి దోహదపడుతుందని వారు అన్నారు.