హైదరాబాద్ నుంచి విజయవాడ కనకదుర్గమ్మకు బంగారు బోనం సమర్పణ

విజయవాడ ఇంద్రకీలాద్రిపై ఉన్న కనకదుర్గమ్మ అమ్మవారికి హైదరాబాద్ నుంచి వచ్చిన భక్తులు బంగారు బోనం సమర్పించారు. హైదరాబాద్ మహంకాళీ జాతర ఉమ్మడి దేవాలయాల ఊరేగింపు కమిటీ ఆధ్వర్యంలో ఈ ఉత్సవం జరిగింది. దాదాపు 2,000 మంది మహిళలు సంప్రదాయ అలంకరణతో బోనాలు తీసుకొని వచ్చారు.

ఆషాడ మాస ఉత్సవాల్లో భాగంగా ప్రతి సంవత్సరం తెలంగాణ నుంచి వచ్చే ఈ బోనాల ఊరేగింపు విజయవాడలోని బ్రాహ్మణ వీధిలోని జమ్మి చెట్టు వద్ద నుంచి ప్రారంభమైంది. అక్కడి నుంచి భక్తులు మేళతాళాలు, సంప్రదాయ నృత్యాలతో ఇంద్రకీలాద్రికి చేరుకుని అమ్మవారికి నైవేద్యం సమర్పించారు. ఉత్సవంలో బంగారు, వెండితో పాటు నాలుగు రకాల ప్రత్యేక బోనాలు ఆకర్షణగా నిలిచాయి.

కమిటీ చైర్మన్ మధుసూదన్ యాదవ్ మాట్లాడుతూ, గత 17 సంవత్సరాలుగా ఈ బంగారు బోనం కార్యక్రమాన్ని నిర్వహిస్తున్నట్టు తెలిపారు. 2,000 మంది భక్తులకు దేవస్థానం సహకారంతో భోజన వసతి కల్పించామని చెప్పారు. తెలుగు రాష్ట్రాల్లో సుభిక్షంగా ఉండాలని, వర్షాలు పడాలని అమ్మవారిని ప్రార్థించినట్టు ఆయన వివరించారు.

ఆలయ అధికారులు ఈ ఉత్సవానికి ప్రత్యేక ఆహ్వానం పలికారు. ఘాట్ రోడ్డు మీదుగా సాగిన ఊరేగింపు ఒక గంటకు పైగా కొనసాగింది. స్థానిక భక్తులు కూడా బోనాలను స్వాగతించగా, ఆధ్యాత్మిక వాతావరణంలో కనకదుర్గమ్మ సన్నిధి సందడిగా మారింది.