హైదరాబాద్‌లో క్రాకర్ గాయాలు: సరోజినీ దేవి కంటి ఆసుపత్రికి 82 మంది

హైదరాబాద్‌లో దీపావళి సందర్భంగా టపాసులు కాల్చడం వల్ల 82 మంది గాయపడ్డారు. మెహదీపట్నంలోని సరోజినీ దేవి కంటి ఆసుపత్రికి వీరు చికిత్స కోసం వచ్చారు.

వచ్చిన వారిలో 70 మందికి వైద్యులు మందులు ఇచ్చి పంపేశారు. మిగిలిన 12 మందిని ఇన్‌పేషెంట్లుగా చేర్చుకుని చికిత్స అందిస్తున్నారు. వీరిలో ఇద్దరి పరిస్థితి ఆందోళనకరంగా ఉంది. ఇన్‌పేషెంట్లలో నలుగురు చిన్నారులు ఉన్నారు. ఒకరు పూర్తిగా కంటి చూపును కోల్పోయారు.

ఆసుపత్రి సూపరింటెండెంట్ తెలిపిన వివరాల ప్రకారం, గత ఏడాది ఇదే సమయంలో 54 మంది OP కి వచ్చారు. ఈసారి ఆ సంఖ్య 60కి చేరింది. వీరిలో 31 మంది పెద్దలు, 29 మంది పిల్లలు ఉన్నారని ఆమె చెప్పారు.

బాధితుల్లో ఒకరు టపాసులు కాల్చలేదు. పక్కనే ఉన్న గేటును మూయడానికి వెళ్లగా, దిశ తప్పి వచ్చిన రాకెట్ ఆయన కంటికి తగిలింది. కనుగుడ్డుకు తీవ్ర గాయమైంది. ఆ కంటి చూపు పోయే అవకాశం ఉందని వైద్యులు అంచనా వేస్తున్నారు. అయితే రెండు కళ్లూ పోయిన బాధితులు ఎవరూ లేరని సూపరింటెండెంట్ తెలిపారు.

ప్రైవేట్ ఆసుపత్రుల్లో ఎంతమంది చికిత్స పొందారనే అంచనా అందుబాటులో లేదని ఆమె పేర్కొన్నారు. పిల్లలను ఒంటరిగా టపాసులు కాల్చడానికి పంపవద్దని సూచించారు. టపాసులపై వంగకుండా పొడవైన అగరబత్తి సాయంతో కాల్చాలని చెప్పారు. పాలిస్టర్ బట్టలు కాకుండా కాటన్ బట్టలు వేసుకోవాలని, ఖాళీ ప్రదేశాల్లోనే కాల్చాలని సూచించారు.