TG-20 లీగ్‌లో హైదరాబాద్ ఈ-ఛాంపియన్స్ వరుసగా రెండో విజయం; రంగారెడ్డికి తొలి ఓటమి

TG-20 లీగ్‌లో హైదరాబాద్ ఈ-ఛాంపియన్స్ జట్టు వరుసగా రెండో విజయాన్ని సాధించింది. రంగారెడ్డి రైజర్స్‌పై 6 వికెట్ల తేడాతో గెలుపొందిన హైదరాబాద్ పాయింట్ల పట్టికలో అగ్రస్థానానికి ఎదిగింది. రంగారెడ్డి రైజర్స్‌కు ఇది ఈ టోర్నీలో తొలి ఓటమి.

టాస్ గెలిచిన రంగారెడ్డి రైజర్స్ ముందుగా బ్యాటింగ్ ఎంచుకుంది. ఓపెనర్ అవనీష్ రావు 25 బంతుల్లో హాఫ్ సెంచరీతో దూకుడుగా ఆడాడు. ఆదిత్య జివాజీతో కలిసి పవర్‌ప్లేలో నష్టపోకుండా 62 పరుగులు చేశారు. 10 ఓవర్లకు 90 పరుగులు దాటింది. మధ్య ఓవర్లలో హైదరాబాద్ బౌలర్లు కట్టుదిట్టంగా బంతులు వేసి పరుగుల వేగాన్ని కట్టడి చేశారు. చివరి ఓవర్లలో ఆదిత్య త్యాగరాజం 17వ ఓవర్లో మూడు సిక్సర్లు, ఒక ఫోర్‌తో 26 పరుగులు రాబట్టాడు. దాంతో 20 ఓవర్లలో 4 వికెట్లకు 195 పరుగులు నమోదయ్యాయి.

196 పరుగుల లక్ష్యంతో బరిలోకి దిగిన హైదరాబాద్‌కు ఆరంభంలోనే కొన్ని వికెట్లు నష్టమయ్యాయి. కెప్టెన్ అభిరద్ రెడ్డి షణ్ముఖ అశ్విన్‌తో కలిసి ఇన్నింగ్స్‌ను నడిపించాడు. 24 బంతుల్లో అర్ధ సెంచరీ పూర్తి చేసిన అభిరద్ 45 బంతుల్లో 99 పరుగులు చేసి శతకానికి ఒక్క పరుగు దూరంలో అవుట్ అయ్యాడు. ఆ తర్వాత యశ్వీర్ గౌడ్ క్రీజ్‌లోకి వచ్చి వరుసగా మూడు సిక్సర్లు బాదాడు. గణేష్ గడుగు అజయంగా నిలవడంతో 18 ఓవర్లలోనే లక్ష్యాన్ని చేధించారు.

ఈ విజయంతో హైదరాబాద్ పాయింట్ల పట్టికలో అగ్రస్థానం పొందింది. అభిరద్ రెడ్డి ప్లేయర్ ఆఫ్ ద మ్యాచ్‌గా, యశ్వీర్ గౌడ్ సూపర్ స్ట్రైకర్ గేమ్ చేంజర్ ఆఫ్ ద మ్యాచ్‌గా నిలిచారు.