హైదరాబాద్ అక్రమ అండాల సేకరణ కేసు: నిందితులకు ఐదు రోజుల పోలీస్ కస్టడీ

హైదరాబాద్‌లో అక్రమంగా అండాలు సేకరించిన కేసులో నిందితులను ఐదు రోజుల పోలీస్ కస్టడీకి అప్పగించాలని కోర్టు ఆదేశాలు ఇచ్చింది. దీంతో నిందితులను విచారించేందుకు పోలీసులు సిద్ధమయ్యారు.

విచారణలో కొన్ని విషయాలు ఇప్పటికే తేలాయి. మంచి జీతం, ఉచిత వసతి, ఉద్యోగ అవకాశాల పేరుతో యువతులను ఆకర్షించినట్టు తెలిసింది. వర్కింగ్ ఉమెన్స్ హాస్టల్స్ ముసుగులో వారిని తీసుకొచ్చి అండాలు సేకరించినట్టు గుర్తించారు. ఒకే యువతి నుంచి పదేపదే అండాలు సేకరించినట్టు కూడా విచారణలో తేలింది.

ఈ కేసులో నకిలీ ఆధార్ కార్డుల వాడకం ప్రధాన అంశంగా మారింది. యువతుల అసలు వివరాలకు బదులు ఫేక్ ఆధార్ కార్డులు సమర్పించినట్టు సమాచారం. నకిలీ ఆధార్ కార్డులు తయారు చేయడంలో పాత్ర ఉందన్న ఆరోపణలపై కొందరిని పోలీసులు ఇప్పటికే అరెస్టు చేశారు. ఆ కార్డులు ఎన్ని కేంద్రాలకు సరఫరా అయ్యాయి, వెనుక ఇంకా ఎవరు ఉన్నారు అనేది దర్యాప్తులో తేలాల్సి ఉంది.

మరోవైపు వైద్య ఆరోగ్య శాఖ కూడా చర్యలు చేపట్టింది. మొత్తం 27 ART కేంద్రాల్లో అధికారులు తనిఖీలు నిర్వహించారు. ఏడు ఆసుపత్రుల్లో నిబంధనల ఉల్లంఘనలు జరిగినట్టు గుర్తించారు. మరో 20 ఫెర్టిలిటీ కేంద్రాలకు నోటీసులు జారీ చేశారు. ఫెర్టిలిటీ కేంద్రాల్లో నిబంధనల అమలు, అండాల సేకరణ ప్రక్రియ, రికార్డుల నిర్వహణపై ఫ్యామిలీ వెల్ఫేర్ కమిషన్ దర్యాప్తు ముమ్మరం చేసింది.

ఈ కేంద్రాలకు లైసెన్సింగ్ అథారిటీ అయిన కమిషనర్ ఆఫ్ హెల్త్ అండ్ ఫ్యామిలీ వెల్ఫేర్ ఈ వివరాలు తెలిపారు. లైసెన్స్ షరతుల్లో ఎక్కడెక్కడ ఉల్లంఘనలు ఉన్నాయో పరిశీలిస్తున్నామని ఆయన చెప్పారు. కొందరికి ఇప్పటికే షోకాజ్ నోటీసులు ఇచ్చామన్నారు. తీవ్రమైన ఉల్లంఘనలు దొరికినా, తృప్తికరమైన జవాబు ఇవ్వకపోయినా చర్యలు తీసుకుంటామని తెలిపారు.

ఐదు రోజుల కస్టడీ విచారణలో IVF కేంద్రాలు, వైద్యులు, మధ్యవర్తుల పాత్రపై నిజానిజాలు తేలనున్నాయి. అసలు కీలక వ్యక్తులు ఎవరు అనేది కూడా ఈ దర్యాప్తులో స్పష్టం కానుంది.