హైదరాబాద్‌లో అక్రమ అండాల సేకరణ కేసు: హార్మోనల్ ఇంజెక్షన్లపై దర్యాప్తు

హైదరాబాద్‌లో అక్రమ అండాల సేకరణ కేసు దర్యాప్తులో కొత్త విషయాలు బయటపడుతున్నాయి. వ్యభిచార రాకెట్‌గా మొదలైన విచారణ చివరకు అక్రమ అండాల సేకరణ నెట్‌వర్క్‌ను బయటపెట్టిందని పోలీసులు తెలిపారు.

మహిళలకు హార్మోనల్ ఇంజెక్షన్లు ఇచ్చి అండాలు సేకరించారా అనేది ఇప్పుడు కీలక ప్రశ్నగా మారింది. ఈ కేసులో స్వాధీనం చేసుకున్న ఇంజెక్షన్లను ఫోరెన్సిక్ సైన్స్ ల్యాబొరేటరీకి పంపించారు. మహిళలను ఈ వ్యవహారంలోకి ఎలా తీసుకొచ్చారు, ఎవరి పాత్ర ఉంది అనే కోణంలో దర్యాప్తు కొనసాగుతోంది.

ART కేంద్రాలు, ఫెర్టిలిటీ సెంటర్ల మధ్య ఉన్న సంబంధాలపై పోలీసులు దృష్టి పెట్టారు. మూడు ఆసుపత్రులు, మూడు ఫెర్టిలిటీ సెంటర్లలో తనిఖీలు నిర్వహించి రికార్డులు స్వాధీనం చేసుకున్నారు. మరో 22 ఫెర్టిలిటీ సెంటర్లకు ART కేంద్రాలతో ఉన్న సంబంధాలను పరిశీలిస్తున్నారు.

ఎగ్ డొనేషన్ అర్హత పత్రాల్లోనూ తప్పుడు వివరాలు ఇచ్చారా అని పోలీసులు పరిశీలిస్తున్నారు. పెళ్లి కాకపోయినా పెళ్లయినట్టు, భర్త లేకపోయినా ఉన్నట్టు ధృవీకరణ పత్రాలు సమర్పించారా అనేది దర్యాప్తులో చూస్తున్నారు. తీసుకున్న రికార్డులను పోల్చి, ఫాల్సిఫై అయినట్టు తేలితే సంబంధిత వ్యక్తులపై చర్యలు తీసుకుంటామని పోలీసులు చెప్పారు.

రాష్ట్రంలో ఇలాంటి సమాచారం తొలిసారిగా అందిందని పోలీస్ కమిషనర్ సుమతి వెల్లడించారు. తల్లి కావాలని కోరుకునే వారు పుట్టబోయే బిడ్డ ఆరోగ్యంపై శ్రద్ధ చూపుతారని, కానీ అండాలు ఏ పద్ధతిలో సేకరిస్తున్నారు, ఆ ప్రక్రియ చట్టబద్ధమా అనేది పరిశీలించడం లేదని ఆమె అన్నారు. దర్యాప్తులో ఆధారాలు ఉన్నవారిని మాత్రమే నిందితులుగా పరిగణిస్తామని సుమతి స్పష్టం చేశారు.