కాళేశ్వరం బ్యారేజ్ల మరమతులకు తుది అనుమతులు ఈ నెలాఖరులోగా: సీఎం రేవంత్ రెడ్డి ఆదేశం

కాళేశ్వరం ప్రాజెక్టులోని మేడిగడ్డ, అన్నారం, సుందిళ్ల బ్యారేజ్ల మరమతులకు ఈ నెలాఖరులోగా తుది అనుమతులు తీసుకోవాలని సీఎం రేవంత్ రెడ్డి అధికారులను ఆదేశించారు. ఏడాది చివరిలోగా పనులు ప్రారంభించాలని కూడా ఆయన చెప్పారు.

మూడు బ్యారేజ్ల పునరుద్ధరణకు దాదాపు ₹4,193 కోట్లతో ప్రతిపాదనలు సిద్ధమయ్యాయి. నిర్మాణ లోపాలకు సంబంధించిన మరమతుల ఖర్చును నిర్మాణ సంస్థలే భరించాలని ప్రణాళికలో పేర్కొన్నారు. అదనపు పనుల ఖర్చును ప్రభుత్వం భరిస్తుంది. పునరుద్ధరణ ప్రాథమిక ప్రణాళికకు కేంద్ర నిపుణుల కమిటీ సూత్రప్రాయ ఆమోదం తెలిపింది.

మరమతులు NDSA నిపుణుల సూచనల ప్రకారమే చేపట్టాలని సీఎం స్పష్టం చేశారు. బ్యారేజ్ల భద్రత విషయంలో ఎలాంటి రాజీ పడకూడదని అధికారులను ఆదేశించారు. దెబ్బతిన్న మూడు బ్యారేజ్లను తిరిగి సురక్షితంగా వినియోగంలోకి తేవడమే లక్ష్యమని ఆయన చెప్పారు. పనులు రెండు దశల్లో చేపట్టాలని సూచించారు.

మేడిగడ్డలో నీళ్లు ఉన్నా లిఫ్ట్ చేయడం లేదని వస్తున్న ప్రచారాన్ని తిప్పికొట్టాలని సీఎం మంత్రులకు చెప్పారు. ప్రస్తుత పరిస్థితుల్లో మేడిగడ్డ నుంచి నీటిని లిఫ్ట్ చేయడం సాంకేతికంగా సాధ్యం కాదని ఇంజనీర్లు వివరించారు. మేడిగడ్డ నుంచి ఎల్లంపల్లికి నీరు చేరాలంటే అన్నారం, సుందిళ్ల గేట్లు మూసి ఉంచాల్సి ఉంటుంది. కానీ నిర్మాణ లోపాల కారణంగా ఆ గేట్లను తెరిచే ఉంచాలని NDSA హెచ్చరించింది.

గోదావరి జలాలను దేవాదుల, సీతారామ ప్రాజెక్టుల ద్వారా ఉపయోగించుకుంటున్నట్లు సీఎం తెలిపారు. దేవాదుల ద్వారా గత ప్రభుత్వ హయాంలో ఏడాదికి సగటున 9.57 TMC నీరు లిఫ్ట్ చేయగా, తమ ప్రభుత్వ హయాంలో సగటున 18.13 TMC లిఫ్ట్ చేసినట్లు ఆయన చెప్పారు. ఇది గతంతో పోలిస్తే 89% అధికం. ఈ విషయంపై BRS స్పందన లభ్యం కాలేదు.