హైదరాబాద్‌లో అక్రమ అండాల సేకరణ రాకెట్: 30 మంది మహిళలకు వైద్య పరీక్షలు

హైదరాబాద్‌లో అక్రమ అండాల (egg) సేకరణ నెట్‌వర్క్‌పై పోలీసులు దర్యాప్తు ముమ్మరం చేశారు. ఈ కేసులో బాధితులుగా గుర్తించిన సుమారు 30 మంది మహిళలకు గాంధీ ఆసుపత్రిలో వైద్య పరీక్షలు నిర్వహించారు.

పశ్చిమ బెంగాల్, బీహార్ సహా మరో ఆరు రాష్ట్రాల నుంచి యువతులను హైదరాబాద్‌కు తీసుకొచ్చినట్టు దర్యాప్తులో తేలింది. డబ్బు ఆశ చూపించి వారిని అండాల దాతలుగా మార్చినట్టు పోలీసులు భావిస్తున్నారు. ఆర్థిక ఇబ్బందుల్లో ఉన్న మహిళలనే ఈ నెట్‌వర్క్ లక్ష్యంగా చేసుకున్నట్టు సమాచారం.

అండాల ఉత్పత్తి పెంచేందుకు మహిళలకు హార్మోన్ ఇంజెక్షన్లు ఇచ్చినట్టు ఆరోపణలు వస్తున్నాయి. వైద్యుల పర్యవేక్షణ లేకుండా ఈ ప్రక్రియ జరిగితే ఓవేరియన్ హైపర్ స్టిములేషన్ సిండ్రోమ్ వంటి సమస్యలు వచ్చే ప్రమాదం ఉందని వైద్యులు హెచ్చరిస్తున్నారు. రక్తం గడ్డకట్టడం, అంతర్గత రక్తస్రావం వంటి సమస్యలు కూడా రావచ్చని చెప్తున్నారు.

గాంధీ ఆసుపత్రిలో ఈ మహిళలకు అల్ట్రాసౌండ్ స్కానింగ్‌తో పాటు రక్త పరీక్షలు చేశారు. అండాల సేకరణ తర్వాత కొందరు మహిళలకు ఆరోగ్య సమస్యలు తలెత్తినట్టు పరీక్షల్లో తేలినట్టు పోలీసులు వెల్లడించారు.

నిబంధనలను దాటవేసేందుకు నకిలీ పత్రాలు వాడినట్టు పోలీసులు అనుమానిస్తున్నారు. పెళ్లి కాని యువతులను పెళ్లయినట్టు చూపించి, భర్త ఉన్నట్టు తప్పుడు పత్రాలు సమర్పించినట్టు విచారణలో వెల్లడైంది. ఆ పత్రాలు ఎవరు సిద్ధం చేశారన్నది కూడా దర్యాప్తులో ఉంది.

సరోగసీ పేరుతోనూ ఈ నెట్‌వర్క్ నడిచినట్టు పోలీసులు అనుమానిస్తున్నారు. గతంలో సికింద్రాబాద్‌లో వెలుగు చూసిన పంకజ్ సోనీ కేసుకు ప్రస్తుత కేసుకు సంబంధం ఉందా అన్న అంశంపైనా దృష్టి పెట్టారు. ఆధారాలు ఉన్నవారినే నిందితులుగా పరిగణిస్తామని పోలీసులు తెలిపారు.

ఎల్బీ నగర్, మల్కాజిగిరి జోన్ పరిధిలో ఈ కేసులు నమోదయ్యాయి. ఈ వ్యవహారంలో FSL నివేదిక కోసం పోలీసులు ఎదురుచూస్తున్నారు. 22 ఫెర్టిలిటీ సెంటర్లపై విచారణ కొనసాగుతోంది.