మహిళపై లైంగిక దాడి, రూ.2 కోట్ల వసూలు ఆరోపణలపై హైదరాబాద్ ఇన్స్పెక్టర్ సస్పెండ్

జూబ్లీ హిల్స్ ఇన్స్పెక్టర్ సిఐ శ్రీనివాస్ రెడ్డి లైంగిక దాడి, బ్లాక్ మెయిలింగ్, డబ్బు వసూలు ఆరోపణలపై సస్పెండ్ అయ్యారు.

మూడేళ్ల క్రితం సంగారెడ్డి జిల్లాలో అమీన్పూర్ ఇన్స్పెక్టర్‌గా పని చేస్తున్న సమయంలో, భర్త వేధింపులపై ఫిర్యాదు చేయడానికి వచ్చిన ఓ మహిళను శ్రీనివాస్ రెడ్డి లొంగదీసుకుని లైంగికంగా వేధించారని ఆరోపణలు ఎదుర్కొంటున్నారు. బాధితురాలి ఫిర్యాదు ప్రకారం, ఆయన ఆమెను తన ఇంటికి తీసుకెళ్లి దాడికి పాల్పడి, ఆ తర్వాత రెండేళ్లపాటు ఆమెను వేధిస్తూ ఫోటోలు, వీడియోలు రికార్డు చేసి బెదిరించారు.

తన నుంచి దాదాపు రూ.2 కోట్లు వసూలు చేశారని ఆమె ఆరోపించారు. డబ్బు లావాదేవీలకు సంబంధించిన స్క్రీన్‌షాట్లు, ఆమెకు అబార్షన్ చేయించినట్లు కొన్ని డాక్యుమెంట్లు కూడా బయటకు వచ్చాయి. గతంలో పలువురు అధికారులకు ఫిర్యాదు చేసినా చర్యలు లేవని, తనకు ప్రాణహాని ఉందని భావించి చివరకు డీజీపీని కలిసి మొరపెట్టుకున్నట్లు ఆమె తెలిపారు.

డీజీపీ ఆదేశాలతో పోలీసు శాఖ అంతర్గత విచారణ చేపట్టగా, ఆరోపణల్లో నిజం ఉన్నట్లు తేలింది. దీంతో హైదరాబాద్ పోలీసు కమిషనర్ శ్రీనివాస్ రెడ్డిని విఆర్‌కు బదిలీ చేసి, ఆ తర్వాత సస్పెండ్ చేశారు. ప్రత్యేక దర్యాప్తు బృందాన్ని కూడా ఏర్పాటు చేశారు.

ఇటీవల బయటకు వచ్చిన ఆడియో క్లిప్‌లో ఇన్స్పెక్టర్ బాధితురాలిని బెదిరిస్తున్నట్లు ఉంది. మరో ఆడియోలో ‘ఆడపిల్లవు జాగ్రత్తగా ఉండాలి’ అంటూ హెచ్చరించినట్లు ఉంది. ఈ విషయంలో ఇన్స్పెక్టర్ శ్రీనివాస్ రెడ్డి నుంచి స్పందన లేదు. బాధితురాలు మాత్రం తనకు న్యాయం కావాలని, కఠిన చర్యలు తీసుకోవాలని డిమాండ్ చేస్తున్నారు. కేసు దర్యాప్తు కొనసాగుతోంది.