హైదరాబాద్ జలమండలి GM అనంత లక్ష్మి కుమార్‌కు 14 రోజుల రిమాండ్

హైదరాబాద్ జలమండలిలో Project Division-3 GM హోదాలో పనిచేస్తున్న సగ్గం అనంత లక్ష్మి కుమార్‌ను ACB అధికారులు ఆదాయానికి మించిన ఆస్తుల కేసులో అరెస్టు చేశారు. కోర్టు ఆయనకు 14 రోజుల జ్యుడీషియల్ రిమాండ్ విధించింది. ఆయనను జంట్లగూడ జైలుకు పంపారు.

మంగళవారం తెల్లవారుజామున 6 గంటలకు ACB అధికారులు మల్లాపూర్ వెంకటరమణ కాలనీలోని కుమార్ నివాసానికి చేరుకున్నారు. హైదరాబాద్, సికింద్రాబాద్, నిజామాబాద్, సంగారెడ్డి జిల్లాలలో మొత్తం 8-9 ప్రదేశాలలో ఏకకాలంలో సోదాలు నిర్వహించారు. నగదు లెక్కించేందుకు counting machine తీసుకురావాల్సిన పరిస్థితి ఏర్పడింది.

సోదాల్లో ₹1 కోటి 10 లక్షల నగదు, 2 కిలోల బంగారం, 9 కిలోల వెండి ఆభరణాలు స్వాధీనం చేసుకున్నారు. రిజిస్ట్రేషన్ విలువ ప్రకారం మొత్తం ఆస్తుల విలువ ₹5 కోట్ల 88 లక్షలుగా నమోదైంది. అయితే బహిరంగ మార్కెట్ విలువ ₹100 కోట్లకు పైగా ఉంటుందని ACB అధికారులు అంచనా వేస్తున్నారు.

సంగారెడ్డి జిల్లా కంది మండలం చేర్యాల సమీపంలో, నిజామాబాద్ జిల్లా నవీపేటలో బినామి పేర్లపై వ్యవసాయ భూములు గుర్తించారు. నవీపేటలో 3.5 ఎకరాల భూమి, 400 చదరపు గజాల కొబ్బరి తోటతో కూడిన farm house ఉన్నట్లు ACB నిర్ధారించింది. హైదరాబాద్‌లో open plots కు సంబంధించిన రిజిస్ట్రేషన్ పత్రాలు కూడా స్వాధీనమయ్యాయి.

కుమార్ భార్య సహా ముగ్గురు కుటుంబ సభ్యులను bank locker తెరిపించడానికి తీసుకెళ్ళారు. లాకర్లలో బంగారు నగలు, పత్రాలు లభ్యమయ్యాయి. బినామి ఆస్తులపై దర్యాప్తు కొనసాగుతోందని ACB అధికారులు తెలిపారు.