హైదరాబాద్ జవహర్ నగర్ దోపిడీ కేసు: నేపాలీ గ్యాంగ్ సభ్యులు అరెస్టు

హైదరాబాద్ జవహర్ నగర్ లోని గల్ఫ్ ఎంక్లేవ్ కాలనీలో జరిగిన దోపిడీ కేసును మల్కాజగిరి పోలీసులు 72 గంటల్లో చేధించారు. నేపాల్ కు చెందిన నలుగురు నిందితులను అరెస్టు చేశారు.

ఈ నెల 12వ తేదీన విజయలక్ష్మి–మురళీమోహన్ దంపతుల ఇంటిలో దొంగతనం జరిగింది. నిందితులు వారికి మత్తు పదార్థం ఇచ్చి, చేతులు కాళ్ళు కట్టి, 60 తులాల బంగారం, 15 కిలోల వెండి వస్తువులు, 3,000 డాలర్లు, రెండు మొబైల్ ఫోన్లు దొంగిలించారు.

మురళీమోహన్ దంపతులు సీనియర్ సిటిజన్లు. వారి పిల్లలు విదేశాలలో ఉంటారు. వారు గత మూడు సంవత్సరాలుగా ఒక ఏజెంట్ ద్వారా నేపాలీ గృహ సహాయకులను నియమించుకుంటున్నారు.

నిందితులు ఇంట్లో పనిమనుషులుగా చేరారు. సుమారు 10 రోజులు ఆ ఇంట్లో నమ్మకంగా పని చేసి, పెద్దల విశ్వాసం పొందారు. 12వ తేదీ రాత్రి 8:30 గంటలకు దాడి చేసి, రాత్రి 11:30 వరకు ఇంటిని దోచారు.

రాత్రి దాడి జరిగిన తర్వాత మురళీమోహన్ మత్తులో ఉన్నారు. ఆవిడ మెల్లగా కట్లు విడిపించుకుని కిటికీ దగ్గర సహాయం కోసం అరిచారు. తెల్లవారు జామున 3 గంటలకు పక్కనే ఉన్న కాంట్రాక్టర్ వర్కర్ వారి అరుపులు విని పోలీసులకు సమాచారం అందించాడు.

పోలీసులు వెంటనే కేసు నమోదు చేసి దర్యాప్తు మొదలుపెట్టారు. వేలిముద్రల ఆధారంగా, 250 కి పైగా CC కెమెరాలు పరిశీలించి, నిందితులు బెంగళూరు వైపు వెళ్ళారని గుర్తించారు. 16వ తేదీన రేతిఫైల్ బస్ స్టాండ్ దగ్గర నలుగురు నిందితులను అరెస్టు చేశారు.

మల్కాజగిరి పోలీస్ కమిషనర్ సుమతి మీడియాతో మాట్లాడారు. సునీత అలియాస్ సబీనా (28), బిస్వాల్ (30), కమల్ బహదూర్ చలానే, జాంకర్ బహదూర్ చలానే అలియాస్ శంకర్ (38) అరెస్టయిన నలుగురు నిందితులు. వీరు నేపాల్ స్థానికులు.

మీనా అలియాస్ మమత అనే మరో నిందితురాలు ఇదే విధమైన మోయినాబాద్ కేసులో కూడా నిందితురాలని పోలీసులు తెలిపారు. మిగిలిన ముగ్గురు నిందితుల కోసం పోలీస్ టీమ్‌లు గాలిస్తున్నాయి.

ఈ కేసు నేపథ్యంలో మల్కాజగిరి కమిషనరేట్ 'మీ సురక్ష' అనే కార్యక్రమాన్ని ప్రారంభించింది. ఇతర రాష్ట్రాల నుండి వచ్చిన అద్దెదారులు మరియు గృహ సహాయకులను తప్పనిసరిగా పోలీసు వద్ద నమోదు చేయాలని విజ్ఞప్తి చేశారు.