హైదరాబాద్‌లో ప్రేమ తిరస్కరించిన యువతి కుటుంబంపై కత్తితో దాడి, 4 మందికి గాయాలు

హైదరాబాద్ లోని రాయదుర్గం పోలీస్ స్టేషన్ పరిధిలో ఓ యువతి కుటుంబంపై యువకుడు కత్తితో దాడి చేశాడు. ప్రేమ ప్రతిపాదనను ఆమె తిరస్కరించడంతో గోవర్ధన్ అనే వ్యక్తి ఈ దాడికి పాల్పడ్డాడు.

పక్కనే ఉన్న ఓ భవనం పై నుండి యువతి ఇంటిలోకి ప్రవేశించిన గోవర్ధన్.. రెండో అంతస్తులో నిద్రిస్తున్న కుటుంబ సభ్యులపై దాడి చేశాడు. నిద్రిస్తున్న యువతి సోదరి గొంతుపై కత్తి పెట్టి చంపేస్తానని బెదిరించాడు. తర్వాత ఆమెను రక్షించేందుకు వచ్చిన తల్లిదండ్రులు, బాబాయిపై కత్తితో విచక్షణా రహితంగా దాడి చేశాడు.

ఈ దాడిలో యువతి తల్లి ముఖం, చేతులకు తీవ్ర గాయాలయ్యాయి. ఆమె కళ్లకు కూడా గాయాలు కావడంతో ఆమెను సహా నలుగురు కుటుంబ సభ్యులను స్థానిక ఆసుపత్రికి తరలించారు. కుటుంబ సభ్యుల కేకలు విన్న స్థానికులు ఘటనా స్థలానికి చేరుకుని గోవర్ధన్‌ను పట్టుకున్నారు. వెంటనే పోలీసులకు సమాచారం అందించారు.

రాయదుర్గం పోలీసులు సంఘటనా స్థలానికి చేరుకుని నిందితుడిని అదుపులోకి తీసుకున్నారు. అతనిపై హత్యాయత్నం కేసు నమోదు చేసి దర్యాప్తు చేపట్టారు. గాయపడిన వారందరూ ప్రాణాపాయం నుంచి బయటపడినట్లు పోలీసులు తెలిపారు.