హైదరాబాద్‌లోని లంగర్ హౌస్, ఉప్పరపల్లిలో భారీ శబ్దం.. స్థానికులు ఉలిక్కిపడ్డారు

హైదరాబాద్‌లోని లంగర్ హౌస్, ఉప్పరపల్లి, ఎర్రబోడ, కేశవ స్వామినగర్ ప్రాంతాల్లో ఉదయం భారీ శబ్దం వినిపించింది. బ్లాస్టింగ్‌ను గుర్తు చేసేలా ఆ శబ్దం వచ్చింది. దీంతో స్థానికులు ఉలిక్కిపడ్డారు.

ఉదయం 9:14 నుంచి 9:20 గంటల మధ్య ఈ శబ్దం వచ్చినట్టు సమాచారం. రాజీనగర్, హైదర్‌గూడ, ఉప్పరపల్లి, ఎర్రబోడ ప్రాంతాల నుంచి పోలీసులకు ఫోన్ కాల్స్ వచ్చాయి. పోలీసులు వెంటనే ఆ ప్రాంతాలకు వెళ్లి పరిశీలించారు.

చైతన్య విలాస్‌లోని సీసీ కెమెరాలో ఈ శబ్దం రికార్డ్ అయింది. 9:14 గంటల ప్రాంతంలో పెద్ద వస్తువు కింద పడినప్పుడు వచ్చేలా శబ్దం ఉన్నట్టు ఆ ఫుటేజీలో కనిపిస్తోంది. శబ్దానికి కారణం ఏంటనేది పోలీసులు ఇంకా నిర్ధారిస్తున్నారు.

ఇది భూకంపం కాదా అనే అనుమానంపై సంబంధిత శాఖలతో సమన్వయం చేస్తున్నారు. రిక్టర్ స్కేల్, సిస్మోగ్రాఫ్ వివరాలను ఆ శాఖలు పరిశీలించి సమాచారం ఇవ్వాలని పోలీసులు కోరారు. వివరాలు వచ్చే వరకు ఎవరూ భయపడాల్సిన అవసరం లేదని వారు తెలిపారు.