హైదరాబాద్‌లో మద్రాస్ రెజిమెంట్ ఆయుధాల చోరీ; పోలీసులు కేసు నమోదు

హైదరాబాద్‌లోని మద్రాస్ రెజిమెంట్ ఆయుధ నిల్వ గదిలో ఆదివారం రాత్రి చోరీ జరిగింది. తాళం పగలగొట్టిన నిందితులు 4 AK-47 తుపాకులు, 6 పిస్టళ్లు, ఒక రైఫిల్ తీసుకెళ్లారు. కొంత మందుగుండు సామగ్రి కూడా చోరీ అయినట్లు అధికారులు గుర్తించారు.

ఈ ఘటనపై ఆర్మీ అధికారులు సోమవారం ఉదయం బొల్లారం పోలీస్ స్టేషన్‌లో ఫిర్యాదు చేశారు. పోలీసులు కేసు నమోదు చేశారు. రక్షణ శాఖకు సంబంధించిన కేసు కావడంతో వివరాలను గోప్యంగా ఉంచుతున్నారు.

ఆయుధ నిల్వ ప్రాంతంలోకి అనుమతి ఉన్న సిబ్బంది తప్ప ఇతరులకు ప్రవేశం ఉండదని అధికారులు తెలిపారు. ఈ నేపథ్యంలో లోపలి సిబ్బందిలో ఎవరో ఈ చోరీ చేసి ఉంటారని అనుమానిస్తున్నారు. CCTV ఫుటేజీని పరిశీలిస్తున్నారు.

మల్కాజిగిరి పోలీస్ కమిషనరేట్ ఉన్నతాధికారుల పర్యవేక్షణలో DCP స్థాయి అధికారి దర్యాప్తు చేస్తున్నారు. ఆయుధాల విలువ సుమారు రూ.15 లక్షలు ఉంటుందని ఫిర్యాదులో పేర్కొన్నట్లు సమాచారం.