హైదరాబాదీ యువకుడిపై అమెరికాలో మతం అడిగి దాడి; కుటుంబం ప్రభుత్వ సహాయం కోరుతోంది

అమెరికాలోని ఉటా రాష్ట్రం సాల్ట్ లేక్ సిటీలో నివసిస్తున్న హైదరాబాదీ యువకుడు మహమ్మద్ సోహైల్ పై గత మంగళవారం ఓ దుండగుడు మతపరమైన దాడికి పాల్పడ్డాడు. ఒక మాల్‌లో పనిచేస్తున్న సోహైల్ వద్దకు వచ్చిన దుండగుడు మొదట నీళ్లు అడిగాడు. ఆ తర్వాత పేరు అడిగి, ‘మీరు ముస్లిమా?’ అని ప్రశ్నించాడు. సోహైల్ అవునని బదులివ్వగా, దుండగుడు ‘జీసస్ పేరిట’ అంటూ వెంటనే కత్తితో విచక్షణారహితంగా పొడిచాడు. ఛాతీ, ఊపిరితిత్తులు, గుండెకు తీవ్ర గాయాలు కావడంతో సోహైల్ ప్రస్తుతం అత్యంత విషమ స్థితిలో చికిత్స పొందుతున్నాడు. దాడిలో 16 సార్లకు పైగా కత్తిపోట్లు పడ్డాయని, అతనికి అనేక శస్త్రచికిత్సలు జరుగుతున్నాయని కుటుంబ సభ్యులు తెలిపారు.

హైదరాబాద్‌లోని సోహైల్ కుటుంబం ఈ ఘటనపై తీవ్ర దిగ్భ్రాంతి వ్యక్తం చేసింది. అతని భార్య తీవ్ర భయాందోళనకు గురైంది. ఆ దేశంలో కొత్తగా ఉన్న ఆమె ఒంటరిగా ఈ పరిస్థితిని ఎదుర్కొలేకపోతోంది. సోహైల్ సోదరి సంధ్య (ఆస్మా) మాట్లాడుతూ, తమ కుటుంబ సభ్యులు అమెరికాకు వెళ్లి సాయం చేయడానికి భారత ప్రభుత్వం, భారత రాయబార కార్యాలయం సహకరించాలని కోరారు. దాడికి పాల్పడిన వ్యక్తిని కఠినంగా శిక్షించాలని, తక్షణమే కుటుంబ సభ్యులకు వీసా మంజూరు చేయించాలని విజ్ఞప్తి చేశారు.

కేంద్ర విదేశాంగ శాఖ, భారత రాయబార కార్యాలయం ఈ విషయంలో స్పందించాలని బాధిత కుటుంబం డిమాండ్ చేస్తోంది. సోహైల్ చికిత్సకు పూర్తి సహాయం అందించడంతోపాటు, అతని భార్యకు భరోసా కల్పించాలని కోరుతున్నారు. ప్రస్తుతం సోహైల్ పరిస్థితి విషమంగా ఉందని, మరిన్ని శస్త్రచికిత్సలు జరగాల్సి ఉందని వైద్యులు చెప్పారు. అమెరికా పోలీసులు దుండగుడిని అదుపులోకి తీసుకున్నారా లేదా అన్నది ఇంకా స్పష్టం కాలేదు.