పాతబస్తీలో 4 రోజుల ఆడ శిశువు విక్రయం; తల్లి, దళారి అరెస్ట్

హైదరాబాద్ పాతబస్తీలో 4 రోజుల వయసున్న ఆడ శిశువును రూ.5 లక్షలకు విక్రయించే ప్రయత్నం జరిగింది. పోలీసులు శిశువును రక్షించి, తల్లి, దళారిని అరెస్ట్ చేశారు.

బాలాపూర్ పోలీస్ స్టేషన్ పరిధిలోని పహాడీ షరీఫ్ ప్రాంతంలో ఈ ఘటన చోటు చేసుకుంది. సామాజిక కార్యకర్త సఫియా మాఫియా అందించిన సమాచారంతో పోలీసులు దాడి నిర్వహించారు. డబ్బు లావాదేవికి ముందు దళారి వహీదా ఖతూన్, తల్లి అఫ్రీన్ బేగంలను రెడ్ హ్యాండెడ్‌గా అదుపులోకి తీసుకున్నారు.

తల్లి అఫ్రీన్ బేగం కుటుంబ ఆర్థిక పరిస్థితిని గమనించిన దళారి, బిడ్డను అమ్మితే డబ్బు వస్తుందని నమ్మించారు. తల్లి తన నాలుగు రోజుల కూతురిని అమ్మడానికి అంగీకరించింది. ఇద్దరు నేరాన్ని అంగీకరించినట్లు పోలీసులు తెలిపారు. శిశువును చైల్డ్ వెల్ఫేర్ కమిటీకి అప్పగించారు.

దళారి వహీదా ఖతూన్ ఇంతకుముందు కూడా పిల్లలను అమ్మినట్లు సామాజిక కార్యకర్త ఆరోపించారు. రెండు నెలల క్రితం మగ శిశువును రూ.7 లక్షలకు విక్రయించినట్లు చెప్పారు. ఈ ముఠాలో హాస్పిటల్‌లో పనిచేసే ఇద్దరు డాక్టర్లు కూడా భాగస్వామ్యం ఉన్నట్లు అనుమానిస్తున్నారు. పోలీసులు ఆ దిశగా దర్యాప్తు చేస్తున్నారు.

నిందితులిద్దరినీ కోర్టులో ప్రవేశపెట్టి రిమాండ్ తరలించారు. ఈ ముఠా ఇతర రాష్ట్రాలతో సంబంధాలు, గతంలో జరిగిన విక్రయాలపై విచారణ కొనసాగుతోంది.