హైదరాబాద్ ORR పై గంటకు 200 కి.మీ వేగంతో కారు నడిపిన యువకుడు అరెస్ట్

మణికొండ అల్కాపూర్ టౌన్‌షిప్‌కు చెందిన కొత్తపల్లి యశ్వంత్ రెడ్డి హైదరాబాద్ ORR పై గంటకు 200 కి.మీ పైగా వేగంతో కారు నడిపాడు. ఈ వీడియోను సోషల్ మీడియాలో పోస్ట్ చేయడంతో నార్సింగి పోలీసులు అతన్ని అదుపులోకి తీసుకున్నారు.

మే 10వ తేదీన నార్సింగి టోల్ ప్లాజా నుంచి తెలంగాణ పోలీస్ అకాడమీ వైపు యశ్వంత్ రెడ్డి తన కొత్త Volkswagen కారును తీసుకువెళ్ళాడు. ORR పైకి రాగానే వేగం 200 కి.మీ పైకి పెంచాడు. అంతేకాకుండా డ్రైవింగ్ చేస్తూ మొబైల్ ఫోన్‌తో వీడియో తీసి సోషల్ మీడియాలో అప్లోడ్ చేశాడు.

ORR పెట్రోలింగ్ అధికారి కారింగల సాయిరామ్ ఈ వీడియోను గమనించి నార్సింగి పోలీసులకు ఫిర్యాదు చేశారు. పోలీసులు సాంకేతిక ఆధారాల సహాయంతో యశ్వంత్ రెడ్డిని గుర్తించారు. విచారణలో అతను తప్పు ఒప్పుకున్నాడు. పోలీసులు కారును స్వాధీనం చేసుకుని అతనిపై కేసు నమోదు చేశారు.

సోషల్ మీడియాలో views కోసం రోడ్లపై stunt డ్రైవింగ్ చేసే వారిపై కఠినమైన చర్యలు తీసుకుంటామని పోలీసులు హెచ్చరించారు.