హైదరాబాద్‌లో నీల్గాయ మాంసం విక్రయిస్తున్న ముఠా అరెస్ట్, 70 కిలోల మాంసం స్వాధీనం

హైదరాబాద్‌లో అడవి జంతువుల మాంసాన్ని విక్రయిస్తున్న ముఠాను పోలీసులు అరెస్ట్ చేశారు. మల్కాజగిరి జోన్ పోలీసులు శామీర్పేట్‌లోని BITS Pilani జంక్షన్ వద్ద వాహనాల తనిఖీ చేస్తుండగా ఒక ఎరుపురంగు బొలెరో వాహనంలో 70 కిలోల నీల్గాయ మాంసాన్ని తరలిస్తున్న ముగ్గురిని పట్టుకున్నారు.

నిందితులుగా ఆప్రాల్‌కు చెందిన సల్మాన్ రాజ్ (అలియాస్ సునీల్), అతని కుమారుడు అఖిల్, డ్రైవర్ ఆదినారాయణలను గుర్తించారు. వీరి వద్ద నుంచి ఒక ఎయిర్ గన్, ఒక లైసెన్స్డ్ గన్, టెలిస్కోప్, బుల్లెట్లు కూడా స్వాధీనం చేసుకున్నారు.

అదిలాబాద్ అటవీ ప్రాంతంలో నీల్గాయను వేటాడి, మాంసాన్ని హైదరాబాద్‌కు తరలిస్తున్నట్లు పోలీసులకు విశ్వసనీయ సమాచారం అందింది. నిందితులు తమ లైసెన్సును దుర్వినియోగం చేస్తూ వన్యప్రాణులను వేటాడినట్లు విచారణలో తేలింది.

పోలీసులు ఆర్మ్స్ యాక్ట్, వైల్డ్ లైఫ్ ప్రొటెక్షన్ యాక్ట్ కింద కేసులు నమోదు చేసి నిందితులను రిమాండ్‌కు తరలించారు. ఈ ఆపరేషన్ హైదరాబాద్ పోలీస్ కమిషనర్ సుమతి ఐపీఎస్ ఆదేశాల మేరకు, SOT DCP మనోహర్, లా అండ్ ఆర్డర్ DCP శ్రీధర్‌ల పర్యవేక్షణలో జరిగింది.