హైదరాబాద్ సిటీ RTC బస్సుల్లో ప్రయాణికుల రద్దీ పెరిగింది; బస్సులు పెంచాలని ప్రజల విజ్ఞప్తి

గ్రేటర్ హైదరాబాద్‌లో సిటీ RTC బస్సుల్లో ప్రయాణికుల రద్దీ గణనీయంగా పెరిగింది. మహాలక్ష్మి ఉచిత ప్రయాణ పథకం కొనసాగుతుండగా, రోజుకు 25 లక్షల మందికి పైగా ప్రయాణికులు ప్రయాణిస్తున్నారు. నగరంలో ప్రస్తుతం దాదాపు 3,000 RTC బస్సులు సేవలు అందిస్తున్నాయి.

స్కూళ్లు, కాలేజీలు మరో వారంలో తిరిగి ప్రారంభం కానుండటంతో రద్దీ మరింత పెరిగే అవకాశం ఉంది. ఉప్పల్, ఘట్కేసర్, మోయినాబాద్, చేవెల్ల, శంకర్పల్లి, మేచల్, పఠాంచెరువు వంటి ప్రాంతాల నుంచి సికింద్రాబాద్, మెహదీపట్నం, ఎల్బీ నగర్, కూకట్పల్లి తదితర ప్రాంతాలకు వెళ్లే మార్గాల్లో బస్సులు సరిపోక ప్రయాణికులు తీవ్ర ఇబ్బందులు ఎదుర్కొంటున్నారు.

విద్యార్థులు, ఉద్యోగస్తులు రద్దీ సమయాల్లో బస్సుల్లో నిలబడటానికి స్థలం లేక కష్టపడుతున్నారు. కొన్ని బస్సులు ప్రయాణికుల తాకిడితో ఆగకుండా వెళ్లిపోతుండగా, ఒక బస్సు మిస్ అయితే మరో బస్సు కోసం 30 నుంచి 40 నిమిషాలు ఎదురుచూడాల్సి వస్తోంది.

RTC అందించిన ‘గమ్యం’ యాప్‌లో బస్సుల సమాచారం సరిగా చూపడం లేదని ప్రయాణికులు ఆరోపిస్తున్నారు. ఉచిత ప్రయాణ పథకాన్ని కొందరు దుర్వినియోగం చేస్తుండటం కూడా రద్దీకి కారణమని వారు చెబుతున్నారు.

పెరుగుతున్న డిమాండ్‌కు అనుగుణంగా డిపోల వారీగా సర్వే నిర్వహించి, విద్యా సంస్థలకు వెళ్లే రూట్లలో బస్సులు పెంచాలని ప్రజలు కోరుతున్నారు. RTC నుంచి స్పందన రావాల్సి ఉంది.