ఏసీ లాంటి చల్లదనం, కూలర్ లాంటి బిల్లు: హైదరాబాద్ స్టార్టప్ కొత్త కూలింగ్ టెక్నాలజీ

ఏసీల వల్ల పెరుగుతున్న పర్యావరణ భారానికి స్వదేశీ పరిష్కారంగా హైదరాబాద్‌కు చెందిన ఒక స్టార్టప్ కంపెనీ పర్యావరణ హిత కూలింగ్ టెక్నాలజీని అభివృద్ధి చేసింది. కన్వెన్షనల్ ఏసీలతో పోలిస్తే ఇది 80 శాతం వరకు విద్యుత్ ఆదా చేస్తుందని కంపెనీ పేర్కొంది.

కంపెనీ ప్రదర్శించిన పెద్ద మిషన్‌పై 'Enabling Net Zero' అని రాసి ఉంది. తక్కువ విద్యుత్‌తో పర్యావరణ హిత కూలింగ్ అనేది దీని లక్ష్యం. మిషన్ లోపల బ్రౌన్ రంగు మెష్ ప్యాడ్‌లు, హీట్ ఎక్స్‌చేంజర్‌లు ఈ టెక్నాలజీలో భాగం. గాలిని రెండు దశల్లో చల్లబరుస్తారు. మొదటి దశలో హీట్ ఎక్స్‌చేంజర్ వేడి గాలి ఉష్ణోగ్రతను తగ్గిస్తుంది, రెండో దశలో నీటి సహాయంతో గాలిని మరింత చల్లబరుస్తారు. ఇది కేవలం కూలర్‌లా నీటితో గాలిని చల్లబరచడం కాదు; రెండు దశల కూలింగ్‌తో పాటు 100 శాతం ఫ్రెష్ ఎయిర్ అందించడం దీని ప్రత్యేకత.

ఈ టెక్నాలజీలో రిఫ్రిజెరెంట్ గ్యాస్ ఉండదు, కంప్రెసర్ ఉండదు. నీటితోనే ఇది పని చేస్తుంది. వేసవిలో ఏసీ లాంటి చల్లని గాలి అందుతుంది, కానీ విద్యుత్ బిల్లు ఎయిర్ కూలర్‌లా ఉంటుందని కంపెనీ వివరించింది.

అదే కంపెనీ నీటి పరీక్షను సులభతరం చేసే పేపర్ బేస్డ్ టెస్ట్ స్ట్రిప్‌ను కూడా ప్రదర్శించింది. నీటిలో ఉండే కొన్ని బ్యాక్టీరియా కంటికి కనిపించవు, కానీ ఆరోగ్యానికి హాని కలిగించవచ్చు. సాధారణంగా నీటి శాంపిల్‌ను ల్యాబ్‌కు పంపి పలు పరీక్షలు చేస్తారు. కొత్త పద్ధతిలో నీటి శాంపిల్‌ను టెస్టింగ్ సొల్యూషన్‌తో కలిపి, ఆ ద్రావణంలో స్ట్రిప్‌ను ముంచుతారు. నీటిలోని బ్యాక్టీరియా యాక్టివిటీ వల్ల స్ట్రిప్‌పై కెమికల్ రియాక్షన్ జరిగి రంగు మారుతుంది. ఈ రంగు మార్పే బ్యాక్టీరియల్ కంటామినేషన్‌కు సంకేతం.

కలర్‌మెట్రిక్ బయోకెమికల్ రియాక్షన్ ఆధారంగా ఈ స్ట్రిప్ పని చేస్తుంది. నీటిలో ఎంత బ్యాక్టీరియా ఉందనే దాన్ని బట్టి స్ట్రిప్ రంగు మారుతుంది. ల్యాబ్ సౌకర్యాలు లేని గ్రామాలు, గ్రామీణ ప్రాంతాల్లో కొన్ని నిమిషాల్లోనే నీటి నాణ్యతను అక్కడికక్కడే పరీక్షించడం ఈ స్ట్రిప్‌తో సాధ్యమవుతుంది.