హైదరాబాద్ లో EV వినియోగంలో 14% జాతీయ వాటాతో అగ్రస్థానం

హైదరాబాద్‌లో ఎలక్ట్రిక్ వాహనాల (EV) వినియోగం దేశంలోనే అత్యధికంగా 14% వాటాతో ముందుంది. రవాణా శాఖ గణాంకాల ప్రకారం, ప్రభుత్వం అమలు చేసిన 100% రోడ్డు పన్ను మినహాయింపు ఫలితంగా 2026 మార్చి నాటికి రాష్ట్రంలో 1.6 లక్షల EV లు విక్రయించబడ్డాయి.

నగరంలో ప్రతిరోజూ సగటున 1,500 వాహనాలు నమోదవుతున్నాయి. ఇప్పటి వరకు 78,000 టూ-వీలర్లు, 23,000 కార్లు, 5,000 త్రీ-వీలర్లు, 250 బస్సులు రోడ్లపై ఉన్నాయి. ఈ పథకం ద్వారా ప్రభుత్వం 860 కోట్ల రూపాయలకు పైగా సబ్సిడీ అందించింది.

కేంద్రం PM ఈ-డ్రైవ్ పథకం కింద హైదరాబాద్‌కు 915 కొత్త ఎలక్ట్రిక్ బస్సులు మంజూరు చేయగా, ఇటీవల 60 బస్సులను రవాణా మంత్రి పొన్నం ప్రభాకర్ ప్రారంభించారు. సీఎం రేవంత్ రెడ్డి ప్రభుత్వ శాఖల్లో కొనుగోలు చేసే అన్ని వాహనాలు EV లే అయి ఉండాలని ఆదేశించారు. ప్రభుత్వ ఉద్యోగులకు 10-20% అదనపు రాయితీ కూడా ప్రకటించారు.

చార్జింగ్ స్టేషన్ల నిర్వహణలో లోపాలు ఉన్నట్లు విమర్శలు ఉన్నాయి. నిపుణులు చార్జింగ్ మౌలిక సదుపాయాలు పెంచాలని, సింగిల్ ఛార్జ్‌తో ఎక్కువ దూరం ప్రయాణించే సాంకేతికత అభివృద్ధి చేయాలని సూచిస్తున్నారు. పెట్రోల్, డీజిల్ ధరల పెరుగుదల, అంతర్జాతీయ రాజకీయ పరిస్థితులు కూడా EV డిమాండ్‌ను మరింత పెంచే అవకాశం ఉంది.