హైదరాబాద్ ట్రాఫిక్ పోలీసులు కొత్తగా 30 పెట్రోలింగ్ బైక్‌లను ప్రారంభించారు

హైదరాబాద్‌లో ట్రాఫిక్ నిర్వహణ మెరుగుపరిచేందుకు నగర ట్రాఫిక్ పోలీసులు 30 కొత్త పెట్రోలింగ్ బైక్‌లను జోడించారు. ఈ 30 బైక్‌ల కోసం రూ.1.5 కోట్లు ఖర్చు చేశారు. ఇప్పటికే ఉన్న 50 బైక్‌లతో కలిపి మొత్తం ఫ్లీట్ 80కి చేరింది.

ఈ ప్రత్యేక బైక్‌లకు సైరన్, మైక్, GPS ట్రాకింగ్, ఫస్ట్ ఎయిడ్ కిట్, రైన్ కోట్ వంటి సదుపాయాలు ఉంటాయి. Google Maps ద్వారా ఎక్కడైనా ట్రాఫిక్ జామ్ గుర్తిస్తే వెంటనే స్పాట్‌కు చేరుకుని జామ్ క్లియర్ చేస్తారు. వీధుల ద్వారా షార్ట్ కట్లతో వేగంగా చేరుకోవడం వీరికి సాధ్యమవుతుంది.

నగరంలోని 27 ట్రాఫిక్ పోలీస్ స్టేషన్లతో ఈ బైక్‌లు అనుసంధానమై ఉంటాయి. ట్రాఫిక్ నియంత్రణ గదికి కూడా లింక్ ఉండటంతో ఎమర్జెన్సీ సమాచారం తక్షణమే చేరుతుంది.

వీరు వరద నీటి నిల్వలు, ప్రమాదాలు, వాహనాలు చెడిపోవడం వంటి పరిస్థితుల్లో ఫస్ట్ రెస్పాండర్లుగా పనిచేస్తారు. రోడ్డు పక్కన అక్రమంగా పార్కింగ్ చేసిన వాహనాలను కూడా తొలగిస్తారు. ఈ కొత్త బైక్‌లతో ట్రాఫిక్ జామ్‌లకు త్వరిత పరిష్కారం లభిస్తుందని పోలీసులు భావిస్తున్నారు.