హైదరాబాద్ ట్రాఫిక్ పోలీసులు: చలాన్లు చెల్లించకపోతే 116 వాహనాలను వేలం వేస్తామని హెచ్చరిక

ఎల్బీ నగర్ ట్రాఫిక్ పోలీస్ స్టేషన్ పరిధిలో వివిధ ట్రాఫిక్ నిబంధనల ఉల్లంఘన కేసుల్లో 116 వాహనాలు సీజ్ చేయబడ్డాయి. వాహనాలు పట్టుబడినప్పటి నుండి యజమానులు వాటిపై పెండింగ్లో ఉన్న జరిమానాలను చెల్లించి తీసుకువెళ్లలేదని పోలీసులు తెలిపారు.

పోస్ట్ ద్వారా నోటీసులు పంపినా ఎవరూ స్పందించలేదని ట్రాఫిక్ సీఐ వెంకటేశ్వరులు వెల్లడించారు. వాహనాలు తిరిగి పొందాలంటే సరైన రిజిస్ట్రేషన్ పత్రాలు చూపించి, పెండింగ్ చలాన్లు పూర్తిగా చెల్లించాలని సూచించారు.

చలాన్లు చెల్లించకుండా వాహనాలు తీసుకోకపోతే, చట్ట ప్రకారం వాటిని వేలం వేస్తామని హెచ్చరించారు. ఈ పరిస్థితి ఎల్బీ నగర్లో మాత్రమే కాకుండా హైదరాబాద్లోని అనేక ఇతర ట్రాఫిక్ పోలీస్ స్టేషన్ల పరిధిలోనూ కనిపిస్తోందని ఆయన చెప్పారు.